ՀՀ Նախագահ Սերժ Սարգսեան Հայ Առաքելական Ս. եկեղեցւոյ Արարատեան հայրապետական թեմի առաջնորդանիստ Ս. Սարգիս եկեղեցւոյ մէջ մասնակցած է Ս. Սարգիս զօրավարի տօնին նուիրուած եկեղեցական արարողութեան: Այս մասին կը տեղեկացնեն ՀՀ Նախագահի մամուլի վարչութենէն։
Ամենայն Հայոց Գարեգին Բ. կաթողիկոսի տնօրինութեամբ Երիտասարդներու օրհնութեան օր հռչակուած Ս. Սարգիսի տօնին նուիրուած եկեղեցական արարողութեան, որ հանդիսապետած է Արարատեան հայրապետական թեմի առաջնորդական փոխանորդ Նաւասարդ արք. Կճոյեան, մասնակցած են նաեւ պաշտպանութեան նախարար Վիգէն Սարգսեան, մշակոյթի նախարար Արմէն Ամիրեան, Արարատեան հայրապետական թեմը ներառող մարզի` Արարատի մարզպետ Արամայիս Գրիգորեան:
Մարտական հերթապահութիւն իրականացնող թիւով 20 պարտադիր ժամկէտային զինուորներ, անոնց ընտանիքի անդամներու, երիտասարդներու, հրաւիրեալներու եւ հաւատացեալ ժողովուրդի մասնակցութեամբ տրուած Ս. պատարագի աւարտին եկեղեցւոյ մէջ կատարուած է զինուորներու օրհնութիւն` Մայր աթոռ Ս. Էջմիածինէն բերուած Ս. Սարգիսի մասունքակիր աջով: Այնուհետեւ առաջնորդարանի դահլիճին մէջ տեղի ունեցած է պարտադիր ժամկէտային լաւագոյն զինուորներէն ներկայ գտնուած զինուորներու խրախուսման հանդիսաւոր արարողութիւն:
Հանրապետութեան նախագահը շնորհաւորական խօսք յղած է տօնին առիթով:
