Փետրուար 1-ին վաճառքի հանոած են «Armenia» թռիչքներու ընկերութեան Երեւան-Պէյրութ ուղիղ չուերթի տոմսերը: Նորութիւնը յատկապէս ուրախացուցած է Պէյրութի հայերն ու Լիբանանի զբօսաշրջութեան նախարար Աւետիս Կիտանեանը: Այս մասին կը հաղորդէ armeniasputnik.am-ը։
«Armenia» թռիչքներու ընկերութեան Երեւան-Պէյրութ կանոնաւոր չուերթը պիտի գործարկուի Ապրիլ 3-ին: Թռիչքը Երեւանէն պիտի իրականացուի շաբաթական երկու անգամ: Ժամանակացոյցին վերաբերեալ արդէն համաձայնութիւն կայ «Զուարթնոց» օդակայանին հետ:
«Կրնամ հպարտութեամբ ըսել, որ իմ ներդրումը ունիմ այս նախագիծին մէջ, որ կարեւոր է մեզի` լիբանանահայերուս համար: Ասիկա ոչ միայն պիտի նպաստէ երկու երկիրներուն միջեւ զբօսաշրջութեան զարգացման, այլեւ պիտի ազատէ մեզ տարանցիկ չուերթներու հետ կապուած անյարմարութիւններէն»,- կայքի թղթակիցին ըսած է Կիտանեանը:
Անոր խօսքով` Լիբանանի հայերը երկար սպասած են այս իրադարձութեան: Այժմ հայրենիք այցելելը շատ աւելի դիւրին պիտի ըլլայ:
Թռիչքի ընկերութիւնը անակնկալ մը եւս մատուցած է. ուղեւորները կրնան Պէյրութ մեկնիլ ամենաաժան գինով եւ իրենց հետ տանիլ 30 քկ ուղեբեռ եւ 10 քկ ձեռքի ուղեբեռ:
Կիտանեանը խոստովանած է, որ կարճ ժամանակահատուածի ընթացքին կրցած է կեանքի կոչել կանոնաւոր ուղիղ թռիչքի փոխադրումներու գաղափարը: Գործը դիւրացուցած է այն փաստը, որ երկու երկիրներուն միջեւ մուտքի արտօնագիրի խնդիր չկայ:
Վերջին տուեալով` իւրաքանչիւր տարի Լիբանանէն Հայաստան կ՝այցելէ մօտաւորապէս 20 հազար մարդ:
