Հայաստանի Հանրապետութեան արդարադատութեան նախարար Արփինէ Յովհաննիսեան Յունուար 16-ին մասնակցած է «2015-2018 ԵԽ-Հայաստան գործողութիւններու ծրագիր. ձեռքբերումներ եւ հեռանկարներ» խորագիրով հանդիպման: Նախարարը շնորհակալութիւն յայտնած է Եւրոպայի խորհուրդին հանդիպումը կազմակերպելու համար եւ ամփոփ ներկայացուցած ՀՀ-ի ժողովրդավարական բարեփոխումներու ոլորտին մէջ արդէն իսկ իրականացած աշխատանքները: Այս մասին կը հաղորդեն Արդարադատութեան նախարարութեան տեղեկատուութեան կեդրոնէն։
Արփինէ Յովհաննիսեան անդրադարձած է Հայաստանի համար նախատեսուած 2015-2018 Գործողութիւններու ծրագիրին, Սահմանադրական բարեփոխումներուն յաջորդած գործընթացներուն, ինչպէս նաեւ ՀՀ Նախագահի կարգադրութեամբ հաստատուած դատա-իրաւական բարեփոխումներու 2012-2016 թուականներու ռազմավարական ծրագիրին: Այդ ծիրէն ներս՝ նախարարը առանձնացուցած է շարք մը կարեւոր ձեռքբերումներ, մասնաւորապէս, դատաւորներու միջեւ գործերու բաշխման ելեկտրոնային կառուցակազմի ներդրում, դատաւորներու գործունէութեան գնահատման առարկայական չափորոշիչներու սահմանում եւ այլն:
Հանդիպման ընթացքին նախարարը ներկայացուցած է նաեւ վերջին 2 տարիներուն ընթացքին ՀՀ-ի մէջ փտածութեան դէմ պայքարի ոլորտին մէջ իրականացուած աշխատանքներն ու արդարադատութեան ոլորտի զարգացման ուղղուած հեռանկարները:
Արփինէ Յովհաննիսեան կրկին շնորհակալութիւն յայտնած է ԵԽ երեւանեան գրասենեակին՝ տարբեր ոլորտներու մէջ արդիւնաւէտ համագործակցութեան համար եւ ընդգծած, որ ՀՀ կառավարութիւնը բարձր կը գնահատէ նոր ծրագիրներու մեկնարկի հնարաւորութիւնը` Հայաստանի մէջ ժողովրդավարական բարեփոխումներու իրականացումը արդիւնաւէտ շարունակելու նպատակով:
