Հայաստանի մէջ տեղի ունեցաւ «Հնդկաստանի օր» ձեռնարկը, որուն ընթացքին ներկայացուեցաւ «Անհաւանական Հնդկաստան» խորագիրը կրող լուսանկարչական ցուցահանդէս, ուր ցուցադրուեցան Հնդկաստան այցելած հայերու կողմէ կատարուած աշխատանքները: Եղաւ փոքր տօնավաճառ, ուր մասնակիցները կրցան ձեռք բերել հնդկական ապրանքներ: Ձեռնարկի սկիզբը ու աւարտին ցուցադրուեցան հնդկական ֆիլմեր: Հնդկաստանի դեսպանը, հնդկական բաղադրատոմսով ազգային ուտեստ պատրաստեց եւ հիւրասիրեց ներկաներուն: Ան նշեց, թէ ինք չէ փորձած հայկական խոհանոցի ճաշատեսակները: «Հայկական խոհանոցին մէջ շատ միս կ’օգտագործեն, իսկ ես բուսակեր եմ, այդ պատճառով չեմ փորձած հայկական կերակուր»,- ըսաւ դեսպանը: Ձեռնարկի կազմակերպիչ Լուսինէ Թորոեան յայտնեց, թէ արդէն 6-րդ տարի ըլլալով նման ձեռնարկներ կը կազմակերպուին, որպէսզի Հայաստանի մէջ ներկայացուի հնդկական մշակոյթը: «Մեր գործունէութեան նպատակն է հնդկական մշակոյթը ներկայացնել հայ հասարակութեան, եւ նոյնը կատարուի Հնդկաստանի մէջ: Կը փորձենք ստեղծել հարթակ մը, ուր կը կարենանք մեր բազմադարեան փորձով փոխանակուիլ, որովհետեւ շատ նմանութիւններ ունինք եւ շատ հետաքրքրական ծրագիրներ կրնանք իրականացնել»,-ըսաւ ան:
