Լեռնային Ղարաբաղի Հանրապետութեան իշխանութիւններուն հետ ձեռք բերուած համաձայնութեամբ` Յունուար 12-ին, ԵԱՀԿ առաքելութիւնը Լեռնային Ղարաբաղի եւ Ազրպէյճանի զինուած ուժերու սահմանագիծի ծրագրային դիտարկում իրականացուցած է ԼՂՀ Մարտունի շրջանին ուղղութեամբ` Աշըղ Վեյսալի բնակավայրի հիւսիս-արեւելքը: Այս մասին կը տեղեկացնեն ԼՂՀ արտաքին գործոց նախարարութեան տեղեկատուական վարչութենէն:
ԼՂՀ պաշտպանութեան բանակի դիրքերէն դիտարկումը իրականացուցած են ԵԱՀԿ գործող նախագահի անձնական ներկայացուցիչի (ԳՆԱՆ) գրասենեակի աշխատակից Պետեր Սուետպերկը (Շուէտ) եւ ԵԱՀԿ Բարձր մակարդակի ծրագրաւորման խումբի (ԲՄՊԽ) ղեկավար գնդապետ Հանս Լամփալցերը (Աւստրիա):
Սահմանագծի հակառակ կողմէն դիտարկումը իրականացուցած են ԵԱՀԿ ԳՆԱՆ դաշտային օգնական Խրիսթօ Խրիսթովը (Պուլկարիա), ԵԱՀԿ ԳՆԱՆ անձնական օգնական Սայմոն Թիլլըրը (Մեծ Բրիտանիա) եւ ԵԱՀԿ ԲՄՊԽ ներկայացուցիչ, գնդապետ Ճաւիթ Էլիասը:
Դիտարկումը անցած է ըստ նախատեսուած ժամանակացոյցին, հրադադարի խախտումներ չեն արձանագրուած:
Դիտարկման առաքելութեան ղարաբաղեան կողմէն ուղեկցած են ԼՂՀ արտաքին գործոց նախարարութեան եւ պաշտպանութեան նախարարութեան ներկայացուցիչները:
