*ՍԵՒԱԿ ՅԱԿՈԲԵԱՆ*
Հակառակ բոլոր կողմերու յայտարարութիւններուն, երէկ Յառաջդիմական Ընկերվար Կուսակցութեան հաղորդագրութիւնը, որ եկաւ բացայայտօրէն շեշտելու, որ տուեալ կուսակցութիւնը Լիբանանի ընտրական 1960-ի օրէնքին կողմնակից է եւ դէմ՝ անոր փոխուելուն, ինչպէս լիբանանեան միւս կողմերը, որոնց իսկական կեցուածքը կը հակասէ նոյն կողմերուն հրապարակային ելոյթներուն, որուն ընթացքին անոնք իբր թէ նոր օրէնք մը մշակելու համամիտ են:
Յառաջդիմական Ընկերվար Կուսակցութեան յայտարարութիւնը չբաւարարուելով այսքանով՝ սպառնացած է յականէ անուանէ բացայայտել բոլոր այն պատասխանատուներուն անունները, որոնք այս հարցով կեղծիքի կը դիմեն փոշի ցանելով խեղճ քաղաքացիին աչքերուն:
Ահաւասիկ հին ու նոր լիբանանեան գայթակղութիւն մը եւս, որ աւելի եւս կը հաստատէ Լիբանանի քաղաքական կեանքի փտածութիւնը եւ օգտագործուած կեղծիքը՝ անարգելով ժողովուրդը:
Ամէն պարագայի Լիբանանցին կարիքը չունէր յաւելեալ փաստերու, թէ զինք ղեկավարող քաղաքական վերնախաւը, ինչպէս միշտ, նաեւ այսօր անկեղծ չէ ժողովուրդին հանդէպ:
