Յունուար 10-ին ՀՀ Սփիւռքի նախարար Հրանոյշ Յակոբեան ընդունեց Գերմանիոյ Պատեն Վիւրթենպերկ երկրամասի հայ համայնքի հոգեւոր հովիւ Տէր Տիրատուր քահանայ Սարդարեանը:
Նախարարը բարձր գնահատեց Տէր հօր ծաւալած ազգանպաստ գործունէութիւնը` շեշտելով այն փաստը, որ Հայ Առաքելական եկեղեցին Սփիւռքի մէջ հայապահպանութեան կարեւոր գործօններէն մէկն է:
Տէր Տիրատուրը նախարարին ներկայացուց Հայաստանի մէջ գտնուելու իրենց առաքելութեան բուն նպատակը, այն է` Ամանորի եւ Սուրբ Ծննդեան տօներուն առիթով Արցախի անապահով ընտանիքներուն օգնութիւն տրամադրելը:
«Սուրբ Ծնունդը սիրոյ եւ ջերմութեան տօն է, մենք պէտք է թո՛յլ տանք, որ Մանուկ Յիսուսը ծնուի մեր մէջ, այլապէս անիմաստ կ’ըլլայ այդ տօնը»,-իր խօսքին մէջ ըսաւ քահանան:
Տէր հայրը նախարարին ներկայացուց Արցախի անապահով ընտանիքներուն իրենց ցուցաբերած 26 թոն օգնութեան մասին` սնունդի եւ հագուստեղէնի տեսքով` աւելցնելով, որ այն շարունակական բնոյթ պիտի կրէ:
Հանդիպման աւարտին Տէր Տիրատուր քահանայ Սարդարեան Սփիւռքի նախարարին հետ քննարկեցին յետագայ համագործակցութեան առընչուող հարցեր:
ՀՀ Սփիւռքի նախարար Հրանոյշ Յակոբեան յոյս յայտնեց, որ այսուհետ երկուստեք աւելի սերտօրէն կը համագործակցին Հայաստան-Սփիւռք-Արցախ կապերու ամրապնդման շուրջ:
