Կառավարութեան հաշուեհամարին մէջ հաւաքուած է 5 միլիառ 474 միլիոն դրամ, իսկ ծախսերը կազմած են 6 միլիառ 272 միլիոն դրամ: Հաւաքուած գումարէն մօտ 800 միլիոն աւելի ծախսած ենք. գումարին մեծ մասը ուղղուած է առաջնագիծի անվտանգութեան բարձրացման:
Այս մասին մամուլի ասուլիսի ժամանակ, «Արցախփրես»-ի թղթակիցի հարցումին ի պատասխան` ըսած է ԼՂՀ վարչապետ Արայիկ Յարութիւնեան` նշելով, որ ծախսերը կատարուած են նաեւ արտապիւճետային այլ միջոցներու հաշւոյն, որոնք պիտի վերականգնեն ժամանակի ընթացքին:
«Հաւաքագրուած գումարից մօտ 2 միլիարդ դրամ մենք ուղղել ենք կամաւորների եւ զօրակոչուածների փոխհատուցումների տրամադրմանը, սոցիալական (ընկերային-ԵՌԳ․) խնդիրների լուծմանը եւ այլ կարիքները հոգալուն, իսկ մնացածը ուղղուել է առաջնագծին: Ուզում եմ նաեւ ընդգծել, որ կառավարութիւնն իր գործունէութիւնը չի ծաւալել միայն արտապիւճետային միջոցների հաշուին: Նախագահը միշտ էլ դրական է արձագանգել պաշտպանութեանը վերաբերող հարցերին: Պիւճէում մենք քիչ ենք ընդգծում ծախսերը, բայց բնակարանների տրամադրման, ենթակառուցուածքների ամրացման, սոցիալական խնդիրների լուծման ծրագրերի համար երբեմն չնախատեսուած գումարներ էլ ենք յատկացնում բանակին»,- ըսած է Ա. Յարութիւնեան:
Անդրադառնալով առաջնագիծի վրայ տեսանկարահանող եւ ժամանակակից սարքերու տեղադրման` ԼՂՀ վարչապետը ընդգծած է, որ բոլոր միջոցառումները կ’իրականացուին զինուորներուն անվտանգութեան աստիճանի բարձրացնելու, դիտարկման կարողութիւնները բարելաւելու, ինչպէս նաեւ հակառակորդին ոտնձգութիւններու փորձերը ժամանակին կասեցնելու համար:
«Ժամանակակից սարքերի տեղադրման աշխատանքներն սկսուել են շատ աւելի շուտ` 2014 թուականի օգոստոսեան դէպքերից յետոյ: Առաջին փուլում արտապիւճետային եւ մեր անձնական միջոցների հաշուին լուծել ենք առկայ խնդիրները, բայց ոչ այն չափով: Ապրիլեան դէպքերը մեզ յուշեցին, որ աշխատանքների ծաւալները պէտք է աւելացնենք: Մենք մեր բոլոր միջոցները ներդնում ենք բանակի մարտունակութեան բարձրացման համար»,- աւելցուցած է Ա. Յարութիւնեան:
