ՀՀ կառավարութիւնը հաւանութիւն տուաւ «Ռազմա-արդիւնաբերական եւ ռազմա-տեխնիկական քաղաքականութեան ռազմավարութիւնը ՀՀ նախագահի կարգադրութեան նախագիծ»-ին, կը հաղորդէ «Մետիամաքս»-ը:
ՀՀ Պաշտպանութեան նախարարի տեղակալ Արա Նազարեան ըսած է, որ փաստաթուղթին ընդունումը պիտի նպաստէ ՀՀ ռազմական արդիւնաբերութեան համակարգային բարեփոխումներու իրականացման:
Նախագիծին ընդունմամբ պիտի կարգաւորուին իրաւաբանական անձերու, անհատ ձեռնարկատէրերու, ՀՀ գործադիր մարմիններու միջեւ յարաբերութիւնները ռազմարդիւնաբերական համալիրի մէջ պետական ռազմարդիւնաբերական քաղաքականութեան ձեւաւորման եւ իրականացման հարցերով:
Պետութեան տնտեսական ու ֆինանսական հնարաւորութիւններու ծիրէն ներս պիտի ընդլայնուին ներհանրապետական արտադրութեան տեսականին, իսկ ՀՀ զինուած ուժերն ու այլ զօրքերը պիտի ապահովուին ժամանակակից սպառազինութեամբ եւ ռազմական սարքերով:
Մինչեւ 2020 թուական Քաղաքականութեան գերակայ ուղղութիւն պիտի հանդիսանայ մետաղամշակող կեդրոններու եւ ճշգրիտ մասեր մշակող հաստոցային պարկի ստեղծումը, ռատիօ-ելեկտրոնային սարքաւորումներու ու մասերու հաւաքման արտադրութեան ստեղծումը, բաղադրեալ նիւթերու, բարձր, գիտատարողունակ ու մրցունակ արհեստագիտութիւններու իւրացումը:
