Բրիտանական «Ipsos MORI» գործակալութիւնը ուսումնասիրած է աշխարհի 40 երկիրներու կրթուածութեան մակարդակը: Ըստ ermenihaber.am-ի՝ թրքական «Diken.com.tr» լրատուակայքը կը տեղեկացնէ, որ Հոկտեմբեր եւ Նոյեմբեր ամիսներուն իրականացուած հարցումներուն, ընդհանուր առմամբ, մասնակցած են 27.250 մարդ: Իւրաքանչիւր երկրէ հարցախոյզին ներգրաւուած են 500-էն 1.000 քաղաքացիներ:
Արդիւնքներու ամփոփումէն պարզուած է, որ Թուրքիան կրթութեան ամենացած մակարդակ ունեցող երկիրներու ցանկին մէջ 9-րդն է: Նշենք նաեւ, որ որեւէ եւրոպական երկիր այս ցանկի առաջին տասնեակին մէջ չկայ:
Յիշեցնենք, որ աւելի առաջ հրապարակուած «Սորվողներու միջազգային գնահատման ծրագիր»-ի (PISA) քննութիւններու արդիւնքներուն համաձայն` ուսման յառաջադիմութեան առումով Թուրքիան 70 երկիրներու ցանկին մէջ 52-րդն էր:
