ՀՀ վարչապետ Կարէն Կարապետեան Դեկտեմբեր 15-ին ընդունած է Հայաստանի մէջ տարբեր ոլորտներ ներկայացնող խումբ մը սուրիահայ գործարարներ` զիրենք յուզող հարցերը լսելու եւ լուծման տարբերակները քննարկելու նպատակով: Այս մասին կը հաղորդէ ՀՀ կառավարութեան մամուլի եւ տեղեկատուութեան գրասենեակը։
Սուրիահայ գործարարները անդրադարձած են տնտեսական համարկման խնդիրներով զբաղելու համար ստեղծուած «Սուրիահայերու միութիւն» հասարակական կազմակերպութեան գործունէութեան, տեղական արտադրութեան խթանման ու արտածման, վարկաւորման, օրէնսդրական դաշտին վերաբերող, ինչպէս նաեւ այլ հարցերու:
«Մենք ամէն ինչով պիտի աջակցինք բոլոր այն ծրագիրներուն, որոնք ուղղուած պիտի ըլլան սուրիահայերուն` Հայաստանի մէջ մնալուն: Դուք մշակոյթ փոխած էք Երեւանի մէջ, գործառոյթի, ծառայութիւններու մարզերուն մէջ, եւ ձեր կայացումը մեզի համար չափազանց կարեւոր է», հաստատած է Կարէն Կարապետեան:
Կառավարութեան ղեկավարը նշած է, որ պետութիւնը պատրաստ է օժանդակութիւն ցուցաբերելու սուրիահայ գործարարներուն` յորդորելով զանոնք իրենց գործարարական ծրագիրներն ու առաջարկները ներկայացնել Հայաստանի տնտեսական զարգացման եւ ներդրումներու նախարարութիւն: Մատնանշուած շարք մը հարցերու առընչութեամբ վարչապետը յանձնարարականներ տուած է համապատասխան նախարարութիւններուն եւ պատրաստակամութիւն յայտնած է սուրիահայ գործարարներուն հետ քննարկելու անոնց գործարարութեան զարգացման վերաբերող որեւէ առաջարկ:
