Դեկտեմբեր 4-ին, Էսթոնիոյ «Բաց երկնքի տակ» թանգարանին մէջ հայկական մշակոյթի օր էր, որուն մասնակցեցան նաեւ Էսթոնիոյ Թալլին եւ Թարթու քաղաքներու «Մաշտոց» հայկական կիրակնօրեայ դպրոցի աշակերտներն ու «Երազանք» երաժշտական խումբը:
Թանգարանի բազմազգ մարդաշատ դահլիճին մէջ Էսթոնիոյ հայկական համայնքի ղեկավար Ռազմիկ Իւանեանի բացման խօսքէն յետոյ ձեռնարկը շարունակուեցաւ Հայաստանի պատմութեան եւ մշակոյթի մասին պատմող յագեցած տեղեկատուական ծրագիրով, հիւրերու հետ աշխոյժ հարցազրոյցներով, «Մաշտոց» կիրակնօրեայ դպրոցի սաներու եւ «Երազանք» երաժշտական խումբի գեղեցիկ, ուրախ երգերով եւ պարերով:
Ձեռնարկին բոլոր ներկաները ճաշակեցին նաեւ հայկական համեղ խոհանոցի անկրկնելի կերակրատեսակները: Մթնոլորտն ալ աւելի հետաքրքիր եւ աշխոյժ դարձաւ ազգագրական «Կարնոյ քոչարի» պարի ուսուցմամբ: Փոքրիկ մասնակիցները ոգեւորուեցան Թարթուի «Մաշտոց» կիրակնօրեայ դպրոցի ուսուցիչ Վաչագան Խաչատրեանի ձեռքի աշխատանքի հմտութեան դասով:
Ձեռարկինաւարտին մասնակիցները միանալով ՀՀ Սփիւռքի նախարարութեան «Դուն ի՞նչ կ’ընես Ղարաբաղի համար» նախաձեռնութեան` լուսանկարուեցան համահայկական շարժման կոչի պաստառով:
