Դեկտեմբերի 12-ին, Լիբանանի ՀՀ դեսպանութեան մէջ Լրագրողներու 8-րդ համահայկական համաժողովի լիբանանահայ մասնակիցները համաժողովի արդիւնքներու արժեւորման նպատակով հանդիպեցան աշխատանքային այցով Լիբանան գտնուող ՀՀ Սփիւռքի նախարար Հրանոյշ Յակոբեանի հետ: Հանդիպման ներկայ էին Լիբանանի մէջ Հայաստանի Հանրապետութեան արտակարգ եւ լիազօր դեսպան Սամուէլ Մկրտչեանը, «Ազդակ», «Արարատ», «Զարթօնք» օրաթերթերու խմբագիրները, ինչպէս նաև համաժողովին մասնակցած լրագրողներ:
Այս տարուան Հոկտեմբեր ամսուն, Հայաստանի մէջ տեղի ունեցած Լրագրողներու 8-րդ համաժողովի մասնակիցները իրենց տպաւորութիւնները, տեսակէտները եւ առաջարկները ներկայացուցին նախարար Հրանոյշ Յակոբեանին: Մասնակիցները նկատեցին, որ Սփիւռքի նախարարութեան կազմակերպած լրագրողներու համաժողովները իրենց դրական արդիւնքները ունեցած են տարբեր ոլորտներու մէջ: Անոնք կարեւորեցին , որ այս համաժողովներուն տարուէ տարի աւելի մեծ թիւով մասնակիցներու ներկայութիւնը եւ անոնց թողած արձագանգները:
Հանդիպման ընթացքին անդրադարձ եղաւ նաեւ համահայկական տեղեկատուական դաշտի միասնականութեան, որու լաւագոյն փաստը ապրիլեան քառօրեայ պատերազմը եղաւ: Ըստ փորձագէտներու, տեղեկատուական դաշտը փայլուն կատարողականութիւն ցոյց տուաւ քառօրեայ պատերազմի ընթացքին: Այս կատարողականութեան մէջ մեծ դերակատարութիւն ունէին լրագրողներու համահայկական համաժողովները, ժողովներու ընթացքին կատարուած հետազօտութիւնները, քննարկումները եւ այլն:
Նախարար Հրանոյշ Յակոբեան օգտաշատ նկատեց շրջաններու մէջ մամուլի ակումբներու ձեւաւորումը, որ կրնայ նպաստել լրագրութեան խնդիրներու, շրջանային հարցերու քննարկման եւ Հայաստան-Սփիւռք կապերու ամրապնդմանն ու խորացմանը: Այս առումով նախարարը կարեւորեց նաեւ ընդհանուր գործին մէջ ներգրաւել օտար լրատուամիջոցներու մէջ աշխատող հայ անհատներ, որոնց միջոցով հայ ձայնը կարելի պիտի ըլլայ հասցնել աշխարհին:
Ան նաեւ նշեց, որ պետք է խորացնել «Դուն ի՞նչ կ’ընես Ղարաբաղի համար» շարժումը եւ զայն աշխուժացնել առաւելաբար դպրոցներու, համալսարաններու, մշակութային ու քաղաքական կեդրոններու մէջ: Նախարար Յակոբեանը անդրադարձաւ նաեւ հայրենիքի մէջ տնտեսական ներդրումներ կատարելու քարոզչական աշխատանքի կարեւորութեան եւ վերջապէս շեշտը դրաւ մայրենիի պահպանութեան եւ աղաւաղման խնդիրներու վրայ: «Հայերէնն ամէն բանից աւելի տաք պէտք է պահենք: Մեր պատասխանատուութիւնն է զգալ ու զգացնել տալ սրբութիւնը մայրենիի: Եթէ լեզուն կորցնենք, ամէն բան կը կորցնենք: Աշխատենք ամէն գնով պահել ու տէր կանգնել մեր լեզուին»,-ըսած է ՀՀ Սփիւռքի նախարարը:
Ներկաները առաջարկեցին, որ համաժողովներու ընթացքին հնարաւորութիւն ստեղծուի բոլոր մասնակիցներու համար՝ քննարկումներուն մասնակցելու, առաջարկուեցաւ նաեւ օտարազգի լրագրողները եւս ներգրաւել եւ տեղեկացման նպատակով հրաւիրել Հայաստան:
Մտահոգութիւն յայտնուեցաւ նաեւ զգոյշ ըլլալու ապատեղեկատուութենէն եւ ամէն գնով բացառելու Սփիւռքի լրատուութեան դաշտին մէջ ապատեղեկատուութեան, յերիւրանքի եւ վիրաւորանքի տարածումը:
Հանդիպման մասնակիցները ողջունելի համարեցին նոր լրագրողները առաջնագիծ տանելու հրաշալի գաղափարը, որ բնականաբար, դրական հետեւանքներ կ’ունենայ լրատուութեան վրայ: Ողջունելի համարուեցաւ նաեւ Հայաստանի Հանրապետութեան եւ Լեռնային Ղարաբաղի նախագահներու եւ վարչապետի հետ լրագրողներու հանդիպումները, որոնք կը նպաստեն շատ աւելի իրազեկ ըլլալու հայաստանեան խնդիրները լուսաբանելու ժամանակ:
Հանդիպման աւարտին քննարկուեցան Լրագրողներու համահայկական 9-րդ համաժողովի նախապատրաստական աշխատանքներն ու յետագայ ընելիքները:
