Հալէպահայ բեմադրիչ Աւօ Գաբրիէլեանի «Տուներ Առանց Դռներու» շարժանկարը արժանացաւ իտալական Թորինոյի 34-րդ Միջազգային Շարժանկարի Փառատօնի գլխաւոր մրցանակին։ Այս մասին կը հաղորդէ Հալէպի «Գանձասար» շաբաթաթերթը։
Փառատօնի Ժիւրին բարձրօրէն գնահատեց Աւոյի հեղինակած այս շարժանկարը, իբրեւ լաւագոյն միջազգային վաւերագրական շարժանկար, յատկապէս նկատի առնելով, որ Աւօն պատերազմական պայմաններու մէջ յաջողած է իր տան պատշգամէն տեսախցիկով աշխարհին ներկայացնել պատերազմի ողբերգութիւնն ու շեշտել, որ Սուրիոյ հայ եւ արաբ բնակչութիւնը հաւասարապէս զոհն են բարբարոսական արարքներու։
Փառատօնին ներկայացուած էին 10 հեղինակային շարժանկարներ.- թրքական, գերմանական, յունական, հոլանտական, արժանթինեան եւ այլն։
Աւօ այս շարժանկարը կը նուիրէ Հալէպին նշելով, որ. «Հալէպը իր մօր՝ Սուրիոյ գրկին մէջ կ՚արիւնի», աւելցնելով, որ այս մրցանակը քայլ մըն է պարզապէս հասնելու այն արդարութեան, որուն կը ձգտի հայ ժողովուրդը հարիւր տարիէ ի վեր։
«Հայերը յաճախ կը շեշտեն, որ երկրորդ Ցեղասպանութիւն մը պիտի չապրին, սակայն ցաւ ի սիրտ՝ այսօր Ցեղասպանութեան կ՚ենթարկուի ոչ միայն Սուրիոյ, այլեւ՝ Իրաքի ու Պաղեստինի ժողովուրդը», կը հաստատէ Աւօ։
