Շաբաթ, 22. 06. 2024

spot_img

Հանդիպում Էվերէսթը Յաղթահարող Արա Խաչատուրեանին Հետ

ՀԲԸՄի  110 ամեակին առիթով  տեղի ունեցող  միջոցառումներուն  ծիրին մէջ,  ՀԲԸՄ-ՀԵԸ-ի կազմակերպութեամբ` Ուրբաթ, 11 Նոյեմբեր 2016-ի երեկոյեան, ՀԲԸՄ-ի Տեմիրճեան կեդրոնին մէջ  հանդիպում մը տեղի  ունեցաւ  Էվերեսթի գագաթը վերջերս բարձացած՝  ՀԲԸՄ-ՀԵԸ-ական Արա Խաչատուրեանին հետ:

DSC_3833

Արա  Խաչատուրեան  սկաուտական մկրտութիւնը ստացած է ՀԲԸՄ-ՀԵԸ-ի Ալեք Մանուկեանի  շարքերուն մէջ,  նախ իբրեւ գայլիկ, ապա՝ սկաուտ: 1983-ին հաստատուած է Մարսէյ, Ֆրանսա:

Հոծ բազմութիւն մը  համախմբուած էր ՀԲԸՄ-ի Տեմիրճեան կեդրոնի  5-րդ յարկը: Հանդիպումին ներկայ էին ՀԲԸՄ-ի  Լիբանանի Շրջանակային  Յանձնաժողովի   ատենադպրուհի տիկին Սիլվա Լիպարիտեան եւ անդամներ, ՀԵԸ-ի  Կեդրոնական Վարչութեան ատենապետ Վիգէն Չերչեան եւ անդամներ, միութենականներ, բարեկամներ:

ՀԲԸՄ-ի գրասենեակի  գործադիր տնօրէնուհի Անիթա Լիպիար ներկայացուց Արա Խաչատուրեանը եւ հրաւիրեց  օրուան հիւրը նկարագրելու աշխարհի ամենաբարձր լեռ Էվերեսթը (ծովու մակերեսէն 8848 մեթր) յաղթահարելու մանրամասնութիւնները:

Արա Խաչատուեան  իր  խօսքը  տպաւորիչ  դարձնելու նպատակով ցուցադրեց Էվերէսթը բարձրանալու մանրամասնութիւնները նկարագրող  տեսաերիզ մը: Ան միաժամանակ  կարեւոր եւ հետաքրքրական  տեղեկութիւններ փոխանցեց  լեռնագնացութեան ընթացքին պատահած դէպքերու մասին, ապա  սպառիչ  բացատրութիւններ  տուաւ իրեն ուղղուած  հարցումներուն: Բնութեան  դժուարութիւնները  յաղթահարելու կամքի այս իւրայատուկ դրսեւորումը մեծ խանդավառութիւն ստեղծեց  ներկաներուն եւ յատկապէս երիտասարդութեան մէջ:

Ara  Khachatourian  -45

Էվերէսթի բարձրունքը  յաղթահարելու  ծրագիրը  յառաջացած է   Հայոց ցեղասպանութեան   հարիւրամեակի  տարին, ի  յիշատակ  մեր բիւրաւոր  նահատակներուն: Սակայն Էվերէսթի  շրջանը հարուածող երկրաշարժը  եւ անոր  յաջորդող  փոթորիկը պատճառ դարձած էր, որ ակամայ հրաժարէր ծրագիրէն:  Եւ ահա  2016-ին, ՀԲԸՄ-ի հիմնադրութեան  110 ամեակի  տարին  կ’իրագործէր  ծրագիրը:

Երեկոյի աւարտին ՀԲԸՄ-ի Շրջանակային Յանձնաժողովի ատենադպրուհի տիկին Սիլվա  Լիպարիտեան երախտիքի   յուշանուէր մը յանձնեց  Արա Խաչատուրեանին: Նոյն միջոցին, տիկին Մայտա  Քիւրեճեան՝  ՀԵԸ-ի Վեթերան Սկաուտներու Համախմբումին անունով  փողկապ մը փոխանցեց: Ապա տեղի ունեցաւ կոկիկ հիւրասիրութիւն մը:

Շաբաթ, 12  Նոյեմբեր 2016-ին, Արա Խաչատուեան այցելեց ՀԵԸ Անդրանիկ Անթիլիաս սկաուտական  շարժումի  կեդրոնը:  Զինք դիմաւորեցին  ՀԵԸ-ի Կեդրոնական Վարչութեան ատենապետ Վիգէն Չերչեանը  եւ ՀԵԸ Անդրանիկ Անթիլիասի գործադիր մարմինի անդամներ: Վիգէն  Չերչեան սկաուտներուն ներկայացուց Արա Խաչատուրեանը:  Ֆրանսահայ ՀԵԸ-ականը  ցուցադրեց Էվերէսթ լեռը բարձրանալու  տեսաերիզը:  Ապա  ան ՀԵԸ-ի Կեդրոնական  Վարչութեան  անդամներու ընկերակցութեամբ՝ այցելեց ՀԵԸ Անդրանիկ Սեւանի Զապէլ Մովսէսեան կեդրոնը: Արա Խաչատուրեանին  դիմաւորեցին  ՀԵԸ Անդրանիկ Սեւանի Գործադիր  Մարմինի անդամները:  ՀԵԸ ԱնդրանիկՍեւան սկաուտական  շարժումի անդամ-անդամուհիները  հետաքրքրութեամբ դիտեցին   տեսաերիզը:

DSC_3957

Հանդիպումի ընթացքին խօսք  առաւ ՀԵԸ-ի Կեդրոնական Վարչութեան ատենադպիր եւ  ՀԵԸ Անդրանիկ Սեւանի  Գործադիրի ատենապետ Յակոբ Թելվիզեանը:  Այցելութիւններուն  առիթով  ՀԵԸ Անդրանիկ Անթիլիաս  եւ ՀԵԸ Անդրանիկ Սեւան  սկաուտական շարժումները  յատուկ  յուշանուէրներով պատուեցին  Արա Խաչատուրեանը:

DSC_4005

ՀԵԸ-ի սկաուտական տարազը իր սրտին մէջ կրող Արա Խաչատուրեան  միութենական  վառ յիշատակներով  հրաժեշտ տուաւ Լիբանանին:

ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒՈՒԱԿԱՆ  ԳՐԱՍԵՆԵԱԿ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին