*ՍԵՒԱԿ ՅԱԿՈԲԵԱՆ*
Հայոց Ցեղասպանութիւնը Հայ ժողովուրդի հաւաքական յիշողութեան կարեւոր մէկ մասնիկն է, անոր ազգային գիտակցութեան բաղկացուցիչ տարրը եւ հայ մարդուն հոգեվիճակին առանցքային կէտերէն մին: Անոր ուղղութեամբ արդարութեան հաստատումը հայուն սրբազան պահանջքն է, որ անժամանցելի է ու անքննարկելի:
Հակառակ վերոյիշեալ այս անխախտ համոզումիս Ամերիկայի իւրաքանչիւր ընտրելի կամ ընտրուած նախագահէն այս ուղղութեամբ յայտարարութիւն կորզելու հայկական մոլուցքը շատ յաճախ անբացատրելի է ինծի համար, մինչ այդ յայտարարութեան գերկարեւորութիւնը՝ անհասկնալի…:
Ինծի համար Ամերիկայի նման ժողովրդավար գերհզօր պետութեան մը ժողովուրդներու ինքնորոշման մարդկային իրաւունքի հիման վրայ Արցախի անկախ պետութեան ճանաչողութիւնը նոյնքան կարեւոր է այսօր:
Չեմ հասկնար ինչո՞ւ մենք նոյն հաստատակամութեամբ եւ հետապնդումի լոպիինկի կամ այլ մեքանիզմով չենք հետապնդեր զայն: Ինչո՞ւ ան մեր ազգային իրաւունքներու պահանջատիրութեան աժանտային մէջ ձեւով մը երկրորդ դիրք կը գրաւէ:
Մտածենք ասոր մասին, սիրելիներ: Մեր առօրեային մէջ որքան կը խօսինք Հայոց Ցեղասպանութեան փաստին մասին, եկէք խօսինք նաեւ արցախահայութեան ինքնորոշման իրաւունքին մասինք: Որքան կը պահանջենք Հայոց Ցեղասպանութեան ճանաչողութիւնը, այնքան պահանջենք նաեւ Արցախի հանրապետութեան միջազգային ճանաչումը:
Հոն ժողովուրդ մը կ’ապրի, սիրելիներ: Ճակատը պահպանող մատաղ հոգիներ: Եկէք նոյն հաստատակամութեամբ եւ հետապնդումի ճամբաներով Սփիւռքի մէջ ունեցած մեր կարելիութիւնները, բարեկամութիւնները եւ քաղաքական ուժը նոյն ուժգնութեամբ տրամադրենք նաեւ Արցախի դատին՝ մեր ապրած երկիրներէն պահանջելով անոր անկախութեան անյապաղ ճանաչողականութիւնը:
