Աշխարհահռչակ «System of A Down» ռոք խումբը կ’աշխատի նոր ալպոմի վրայ: Այդ մասին յայտարարած է խումբի թմբկահար Ճոն Տոլմայեանը:
Ըստ անոր, արդէն պատրաստ է 15 երգ, կը գրէ panarmenian.netի՝ վկայակոչելով NMEն:
«Մենք արդէն 6 ամիսէ կ’աշխատինք ալպոմի ստեղծման վրայ եւ արդէն մօտ 15 երգ կայ, որոնք, մեր կարծիքով, արժանի են տեղ գտնելու ալպոմին մէջ»,- ըսած է թմբկահարը:
«Հիմա մենք կրնանք աւելի լաւ նուագել, քան երբեւէ: Մենք կ’աշխատինք ինչ որ նոր բան մտածել եւ երբեք չենք ձգտիր կրկնելու Toxicityին միայն այն պատճառով, որ անիկա ամենայաջող եղած է մեր ասպարէզին մէջ: Մենք ամբողջովին նոր բան կը ստեղծենք` երկրպագուներու նոր սերունդին համար»,- ըսած է Տոլմայեանը:
Խումբը նաեւ պիտի ըլլայ Download Festival 2017ի առաջատարը Aerosmithի հետ համատեղ: «System of a Down»ը պիտի ստանձնէ այդ դերը արդէն երրորդ անգամ: Նախորդ երկու անգամը եղած է 2005ին եւ 2011ին:
