Հոկտեմբեր 10-ին, առաւօտեան ժամը` 05:00-ին, հրթիռ մը ինկած է Հալէպի Թելեֆոն հաուայի թաղամասին մէջ գտնուող Հայ աւետարանական «Բեթել» վարժարանին վրայ:
«Վարժարանին շէնքը բաւական վնասներ կրած է: Բարեբախտաբար, մարդկային զոհեր չենք ունեցած: Վաղ առաւօտ էր, եւ դեռ աշակերտները վարժարան չէին եկած,- «Հայերն այսօր»-ի հետ զրոյցի ընթացքին ըսած է Սուրիոյ Հայ աւետարանական եկեղեցիներու խորհուրդի նախագահ, վերապատուելի Յարութիւն Սէլիմեան եւ աւելցուցած,-իմ բնակարանս դպրոցէն մօտ 30 մեթր հեռաւորութեան վրայ կը գտնուի: Ես հրթիռին ձայնը լսեցի, բայց մտածեցի, որ մեր բնակութեան վայրէն հեռու ինկած է: Եւ միայն առաւօտեան պարզեցինք, որ հրթիռին թիրախը մեր վարժարանն էր»:
Հակառակ հրթիռակոծութեան` վարժարանին մէջ դասերը չեն ընդհատուած.«Առաւօտեան մենք փորձեցինք ամէն ինչ կարգի բերել, որպէսզի երեխաները շատ բան չտեսնեն: Հրթիռը հիմնականօրէն վնասած էր վարժարանին տանիքը եւ 12-րդ դասարանը: Այդ դասարանի աշակերտները մենք այլ դասասենեակ տեղափոխեցինք: Շուտով կը սկսենք վերանորոգման աշխատանքները»,-նշած է Յարութիւն Սէլիմեան:
