Հայաստան չի քննարկեր հալէպահայերու զանգուածային տարհանման հարցը: Այս մասին «Մետիամաքս»-ին ըսած է ՀՀ արտաքին գործոց նախարարութեան մամուլի խօսնակ Տիգրան Պալայեանը:
Վերջին օրերուն ռազմական իրավիճակի սրման հետեւանքով Հալէպի մէջ տուժած են շարք մը հայաբնակ թաղամասեր, կան զոհեր:
Ոչ պաշտօնական տուեալներով` Հալէպի մէջ մնացած հայերուն թիւը կը կազմէ 8-10 հազար: Քաղաքին մէջ կը շարունակէ աշխատիլ Հայաստանի գլխաւոր հիւպատոսութիւնը:
Հայաստան մարդասիրական օգնութեամբ երկու օդանաւ ուղարկած է Սուրիա, իսկ աւելի առաջ ՀՀ արտաքին գործոց նախարարութիւնը հանդէս եկած էր յայտարարութեամբ:
«Առանձնայատուկ անհանգստութիւն կը պատճառէ յատկապէս Հալէպի, ինչպէս նաեւ` հայաբնակ թաղամասերու, խաղաղ բնակչութեան դէմ զէնքի խիստ դատապարտելի կիրառումը, որուն հետեւանքով կան մարդկային մեծաթիւ կորուստներ»,- ըսուած էր յայտարարութեան մէջ:
