ԼՂՀ հռչակման 25–րդ տարեդարձին առիթով համաներում յայտարարելու մասին ԱԺ որոշման նախագիծը Օգոստոս 25-ին ընդունուած է ԱԺ արտահերթ նստաշրջանի լիագումար նիստին: Այս մասին կը յայտնեն ԼՂՀ ԱԺ-էն:
Որոշման նախագիծին կողմ քուէարկած են բոլոր` 28 պատգամաւորները:
Յիշեցնենք, որ Օգոստոս 24-ին ԼՂՀ Ազգային ժողովի նախագահ Աշոտ Ղուլեան խորհրդարանի փոխնախագահի, մշտական յանձնաժողովներու ղեկավարներու եւ աշխատակազմի պատասխանատուներու մասնակցութեամբ հրաւիրած էր աշխատանքային խորհրդակցութեան` քննարկելով Արցախի Հանրապետութեան նախագահի առաջարկը ԼՂՀ հռչակման 25–րդ տարեդարձին առիթով համաներում յայտարարելու մասին:
Որոշման նախագիծը պատգամաւորները քննարկած էին ԱԺ պետական-իրաւական հարցերու մշտական յանձնաժողովին եւ անհրաժեշտ պարզաբանումներ ստացած ԼՂՀ նախագահի ներկայացուցիչ Արայիկ Լազարեանէն:
