Միշըն Հիլզի «Արարատ-Էսքիճեան» թանգարանի եւ Հայկական գորգի ընկերակցութեան կազմակերպութեամբ, Շաբաթ, Օգոստոս 20-ին, երեկոյեան ժամը 5-ին տեղի պիտի ունենայ հայկական գծագրուած եւ եկեղեցական կտաւներու նուիրուած դասախօսութիւն մը, որ պիտի հարստացուի լուսանկարներու ներկայացումով։ Այս մասին կը հաղորդէ ԱՄՆ-ի «Ասպարէզ» օրաթերթը։
Արուեստի այս իւրայատուկ ոլորտի մասնագէտ Պերճ Աշճեան պիտի խօսի ընդհանրապէս Հնդկաստանի մէջ տարածուած այս կտաւներուն մասին, որոնց հայկական տարբերակները իրենց մէջ կը պարունակեն Հայց. եկեղեցւոյ, ինչպէս նաեւ հայ իշխաններու եւ հարուստ առեւտրականներու ընտանիքներու պատմութեանց տուեալներ։
Ձեռնարկը տեղի պիտի ունենայ «Արարատ տան» «Շին» մատուրին մէջ. հասցէ՝ 15105 Mission Hills Road, Mission Hills, CA 91345։
Յաւելեալ տեղեկութեանց համար, դիմել (747) 500-7545 թիւին կամ Ararat-eskijian-museum@netzero.net հասցէին։
