*ՄԱՐԻԱՆՆԱ ԱՆԱՆԵԱՆ*
Օգոստոս 8-ին «Իմ Հայաստան» համահայկական 3-րդ փառատօնի «Խմբերգային արուեստի օրեր»-ու մասնակիցները մեկնեցան Լոռի մարզ: Նախ անոնք այցելեցին Սպիտակի երկրաշարժի զոհերու յիշատակին նուիրուած յուշահամալիր` յարգանքի տուրք մատուցելով անմեղ զոհերու յիշատակին:
«Հայերն այսօր»-ի փոխանցմամբ` երեկոյեան Վանաձորի թիւ 1 երաժշտական դպրոցին մէջ կայացաւ համերգային ծրագիր, որուն ընթացքին ելոյթներով հանդէս եկան Մոսկուայէն «Շողեր» (գեղարուեստական ղեկավար եւ խմբավար` Ելէնա Բեգլարեան), Գահիրէէն «Արաքս» (գեղարուեստական ղեկավար եւ խմբավար` Միհրան Թերզիպաշեան), Սպահանէն «Տաթեւ» (գեղարուեստական ղեկավար եւ խմբավար` Համիկ Ալեքսանեան), Էսթոնիայէն «Երազանք» (գեղարուեստական ղեկավար եւ խմբավար` Ռուզաննա Համբարձումեան) երգչախումբերը: Այնուհետեւ ելոյթ ունեցաւ Վանաձորի կամերային երգչախումբը` կատարելով Կոմիտաս:
Համերգի աւարտին բեմահարթակ հրաւիրուեցան բոլոր երգչախումբերը: Ողջոյնի խօսքով հանդէս եկաւ «Իմ Հայաստան» համահայկական փառատօնի գեղարուեստական ղեկավար Էտուարտ Եսայեանցը եւ շնորհակալութիւն յայտնեց Լոռիի մարզպետարանին` ջերմ ընդունելութեան համար: Իր հերթին Լոռիի մարզպետի տեղակալ Տիգրան Պատոյեան շնորհակալագիրներ յանձնեց փառատօնի բոլոր մասնակիցներուն:
«Հայերն Այսօր»
