Աշխատանքային այցելութեամբ Պրազիլ գտնուող նախագահ Սերժ Սարգսեան, Հայաստանի ազգային ողիմպիական կոմիտէի նախագահ Գագիկ Ծառուկեանի ուղեկցութեամբ, Ռիօ Տէ Ժանեյրոյի մէջ հանդիպում ունեցաւ 31-րդ ամառնային ողիմպիական խաղերուն Հայաստանը ներկայացնող մարզիկներուն հետ: Նախագահը վստահութիւն յայտնեց, որ հայ մարզիկները պիտի ունենան յաջողութիւններ եւ յիշեցուց, որ այդ յաջողութիւնները նաեւ մեր ժողովուրդին աւելի ճանաչելի կը դարձնեն: Սարգսեան շեշտեց, որ հայ մարզիկները կը մրցին այլ՝ աւելի մեծ ազգերու ընտրեալներուն հետ, որոնք իրենց սեփական երկիրներուն մէջ հազարաւոր մրցակիցներ ունին, եւ այդ հանգամանքէն մեկնելով է, որ հայ մարզիկի ձեռքբերումը աւելի կ’արժեւորուի:
