Արցախի Հանրապետութեան նախագահ Բակօ Սահակեան Օգոստոս 2-ին այցելած է Հատրութի շրջան: Այս մասին կը հաղորդեն Արցախի Հանրապետութեան նախագահի աշխատակազմի տեղեկատուութեան գլխաւոր վարչութենէն։
Տող գիւղի մօտակայքը՝ երկրի ղեկավարը խորհրդակցութիւն հրաւիրած է Հատրութի շրջվարչակազմի եւ համայնքներու ղեկավարներուն մասնակցութեամբ` նուիրուած 2016 թուականի հացահատիկային մշակաբոյսերու բերքահաւաքի ընթացքին:
Նախագահը գոհունակութեամբ նշած է, որ այս տարի շրջանին մէջ հացահատիկային մշակաբոյսերու համախառն բերքի ծաւալը կը գերազանցէ վերջին 8 տարուան ցուցանիշները:
Նախագահ Սահակեան յանձնարարականներ տուած է քննարկուած խնդիրներու պատշաճ լուծման ուղղութեամբ` աւելցնելով, որ շրջանին մէջ առկայ են բաւարար պայմաններ հետեւողականօրէն բարձրացնելու ե՛ւ համախառն բերքի, ե՛ւ բերքատուութեան ցուցանիշները:
Նոյն օրը նախագահը այցելած է «Ազատ հայրենիք» կուսակցութեան կողմէ կազմակերպուած «Հայրենիք» երիտասարդական ճամբար, հանդիպած երիտասարդներու հետ եւ ջերմ ու անմիջական մթնոլորտի մէջ զրուցած տարբեր թեմաներու շուրջ: Երկրի ղեկավարը կարեւոր համարած է նման ճամբարներու նշանակութիւնը երիտասարդներու հայեցի դաստիարակութեան եւ հայրենիքը ճանչնալու տեսանկիւններէն:
Նախագահին ուղեկցած են վարչապետ Արայիկ Յարութիւնեան եւ պաշտօնատար այլ անձինք:
