Հայաստանի մէջ ընթացիկ տարուան առաջին կիսամեակին ծնած է 18 հազար 439 մարդ, մահացած 14 հազար 306, բնական հաւելաճը կազմած է 2.7 պրոմիլ: Ասիկա կը վկայեն ՀՀ Ազգային վիճակագրական ծառայութեան «Հայաստանի Հանրապետութեան սոցիալ- տնտեսական վիճակը 2016 թուականի Յունուար-Յունիսին» հրապարակման տուեալները:
Ծնածներուն թիւով առաջատարը Երեւան քաղաքն է, ուր ծնած է 7186 մարդ, Արարատի մարզը` 1666 եւ Կոտայքը`1628 մարդ: Ծնելիութեան ամենացած մակարդակը առկայ է Վայոց Ձորի մէջ` 2016-ի առաջին եռամսեակին ծնած է 296 մարդ, Տաւուշի մէջ` 678, Սիւնիքի` 756 մարդ: Մահացածներու թիւով կրկին առաջատար է Երեւանը (կապուած բնակչութեան քանակով)` 4650 մարդ, Լոռին` 1533 մարդ, Շիրակը` 1334:
Մահերու թիւով ամենափոքր ցուցանիշները արձանագրուած են Վայոց Ձորի մէջ՝ 278, Արագածոտնի մէջ` 615, Սիւնիքի մէջ` 695 մարդ: 2015-ի առաջին կիսամեակի համեմատ ծնածներու թիւը 2016-ի նոյն ժամանակահատուածին նուազած է 1.2 տոկոսով, մահացողներունը` 2.6 տոկոսով:
Բնական հաւելաճը աճած է 3.7 տոկոսով: 1000 բնակիչի հաշիւով ծնունդներու թիւը 12 է, մահերու թիւը` 9: 2016-ի Յունուար-Յունիսին 2015-ի նոյն ժամանակաշրջանի համեմատ` արձանագրուած է 0-1 տարեկան երեխաներու մահուան դէպքերու աճ` 8.2 տոկոսով, իսկ մանկական մահացութեան գործակիցը 1 000 կենդանի ծնածի հաշուով կազմած է 9.3 պրոմիլ` 2015-ի նոյն ժամանակաշրջանի 8.5 պրոմիլի համեմատ:
Յղիութեան հետ կապուած բարդութիւններէն, ծննդեան եւ յետծննդեան ժամանակահատուածին 2016-ի Յունուար-Յունիսին արձանագրուած է մայրական մահացութեան 3 դէպք:
