Երեւանի Էրեբունիի շրջանի Խորենացի փողոցի վրայ Ոստիկանութեան Պարեկապահակային գունդի կեդրոնը գրաւած՝ Սասնայ ծռեր խումբին ելեկտրական հոսանք, սնունդ եւ բժշկական ծառայութիւններ չեն տրուիր: Այս մասին Խորենացի փողոցին վրայ տեղի ունեցած բացօթեայ ասուլիսի ժամանակ նշեց՝ Հիմնադիր խորհրդարանի անդամ Ալեք Ենիգոմշեան: Անոր խօսքով այդ միջոցառումները իշխանութիւններուն կողմէ կացութեան մագլցումի տանող քայլեր են: «Նախօրէին փորձ կատարուած է մօտենալ տարածքին եւ պատ քանդել։ Այս առաւօտեան մթնոլորտի թեժացման քայլ կատարուած է՝ ռազմական ուղղաթիռը ցածէն թռած է տարածքին վրայ եւ ասոնք ցոյց կու տան, որ վարչախումբը հակում չունի խաղաղ մթնոլորտի մէջ շարունակելու բանակցութիւնները», ըսաւ Ենիգոմշեան զգուշացնելով, որ ամէն վայրկեան կրնան լուրջ զարգացումներ ըլլալ: Այնուհետեւ համակարգող խորհուրդի նախաձեռնող խումբի անունով յայտարարութիւն ընթերցեց Ալպերթ Պաղտասարեան՝ նշելով, որ Սասնայ ծռեր խումբը դիմած է ժողովուրդի ապստամբութենէն բխած իրաւունքի իրացման, իսկ իշխանութիւնները խախտելով բոլոր միջազգային չափանիշերը, կը փորձեն տղաքը մատնել սովամահութեան: «Թափուած իւրաքանչիւր կաթիլ արեան, խեղուած իւրաքանչիւր ճակատագրի համար պատասխանատու է Սերժ Սարգսեանը անձամբ», -ըսաւ ան:
