«Ոսկէ ծիրան» փառատօնի դատական կազմի նախագաh ընտրուած է երաժշտահան Տիգրան Մանսուրեան: Այս մասին լրագրողներուն յայտնած է «Ոսկէ ծիրան» ՄԿՓ-ի հիմնադիր տնօրէն Յարութիւն Խաչատրեան:
«Մանսուրեանին բոլորն են սիրում` թէ՛ երաժշտութիւնը, թէ՛ անձը, թէ՛ որպէս քաղաքացի: Երբեմն ես վախենում եմ, քանի որ մտածում եմ, որ եթէ «Ոսկէ ծիրան»-ը չլինի, մեր մեծերին ոչ ոք չի յիշի: Չէ, կը յիշեն, բայց նրանց պէտք է յիշել ոչ միայն յոբելեանների ժամանակ»,- ըսած է Խաչատրեան, կը մէջբերէ Yerkir.am-ը:
22 Յունիսին ներկայացուած է «Ոսկէ ծիրան» Երեւանի 13-րդ միջազգային ֆիլմի փառատօնի մրցութային ծրագիրներն ու միջազգային ժիւրիներու կազմը:
Երաժշտահանը ծնած է Պէյրութ 1939-ի Յունուար 27-ին, 1947-ին ընտանիքը հայրենադարձուած է Հայաստան եւ բնակութիւն հաստատած Արթիկի մէջ: Մանսուրեան աւարտած է տեղի եօթնամեայ դպրոցը, Երեւանի երաժշտական ուսումնարան ընդունուելու համար սորված է նոթաները: 1956-ին ընտանիքը տեղափոխուած է Երեւան: Յետոյ արդէն երաժշտանոցը, ստեղծագործ տարիները:
Մանսուրեանին բոլորը գիտեն «Կտոր մը երկինք» ֆիլմին համար գրուած անոր երաժշտութեամբ` շատ յուզական, սրտաբուխ եւ այդքան հարազատ Վահան Թոթովենցի ստեղծագործութեան ոգիին, որուն վէպով ալ նկարահանուած է ֆիլմը: Մանսուրեան այդ երաժշտութիւնը գրած էր Սերգէյ Փարաճանովի «Նռան գոյնը» ֆիլմին համար: Միխայիլ Վարդանովի «Աշնանային հովուերգութիւն», Հենրիխ Մալեանի «Մենք ենք` մեր սարերը», Բ. Յովհաննիսեան «Տէրը» Հրանդ Մաթեւոսեանի վէպի հիման վրայ, Սերգէյ Իսրայէլեանի «Սպիտակ անուրջները», անզուգական «Մեր մանկութեան դանկոն» Գալեայ Նովենցի ու Ֆրունզիկ Մկրտչեանի դերակատարմամբ, որուն բեմադրիչն է Ալպերթ Մկրտչեան, ահա ֆիլմերու այն ոչ լիարժէք ցանկը, ուր կը հնչէ Մանսուրեանի երաժշտութիւնը, յաճախ, պարզապէս վերածուելով ֆիլմի լիիրաւ հերոսի, երբեմն նոյնիսկ` գլխաւոր:
Մանսուրեան նաեւ երաժշտութիւն գրած է Ներսէս Շնորհալիի, Գրիգոր Նարեկացիի, Խաչատուր Կեչարեցիի, Նահապետ Քուչակի, Յովհաննէս Թումանեանի, Չարենցի, Կոստան Զարեանի, Մաթեւոս Զարիֆեանի, Վահան Տէրեանի, Աւետիք Իսահակեանի, Ռազմիկ Դաւոյեանի խօսքերով:
