Հռոմի պապը երկխօսութեան, խաղաղութեան կամուրջներ նետելու ուղիին մասին կը խօսի: Եթէ ինչ որ մէկը ուշադիր լսէ ու կարդայ անոր ըսածը, չի գտներ բան մը` մեկնաբանելու որպէս «խաչակրաց ոգի», Էջմիածինի մէջ լրագրողներու հետ ճեպազրոյցի ընթացքին յայտնած է Սուրբ Աթոռի մամուլի գրասենեակի տնօրէն մոնսինիոր Ֆետերիքօ Լոմպարտին` անդրադառնալով ցեղասպանութեան մասին Պապի ելոյթի առնչութեամբ պաշտօնական Անգարայի յայտարարութեան:
«Ես կրնամ յորդորել ճիշդ կարդալ ու ընկալել Պապի ըսածն ու գրածը: Ես կը հասկնամ խնդիրներու, լարուածութեան վերաբերեալ կան այլ պատկերացումներ, բայց անոր ըսածը ժողովուրդներու միջեւ հիմքեր գծելուն ուղղուած է: Ան աղօթած է յանուն ատոր: Ան որեւէ խօսք չէ արտայայտած թուրք ժողովուրդին դէմ, ան խօսած է թուրքերու ու հայ ժողովուրդի միջեւ հաշտութեան մասին»,- ըսած է Սուրբ Աթոռի ներկայացուցիչը:
Բացի ատկէ` Լոմպարտին յորդորած է խուսափիլ «խաչակրաց ոգի» արտայայտութենէն` նշելով, որ «Պապը երբեւէ խաչակրաց արշաւի չէ ելած, ան ոչ թէ կը փորձէ պատերազմ մղել, այլ` խաղաղութիւն կառուցել»:
Թրքական «Հուրիեթ» պարբերականի հաղորդմամբ` Թուրքիոյ փոխվարչապետ Նուրեթթին Ջանիկլին «մեծ դժբախտութիւն» անուանած է Պապի յայտարարութիւնը: Ան նշած է, թէ ատիկա ցոյց կու տայ «պապական աթոռի խաչակրի գիտակցութիւնը»: «Ատիկա առարկայական յայտարարութիւն չէր, անիկա իրականութեան հետ որեւէ առերեսում չունէր», ըսած է Ջանիկլին:
Հռոմի Սրբազան Քահանայապետ Ֆրանչիսկոս Պապը Յունիսի 24-ին ելոյթ ունեցած է ՀՀ նախագահի նստավայրին մէջ նախագահ Սերժ Սարգսեանի, իշխանութիւններու, հասարակայնութեան եւ Երեւանի մէջ հաւատարմագրուած դիւանագիտական անձնակազմի ներկայացուցիչներուն հետ հանդիպման ժամանակ: Ելոյթին մէջ ան, շեղուելով նախապէս պատրաստած եւ լրատամիջոցներու ներկայացուցիչներուն նախօրօք բաժնած ելոյթի բնագիրէն, կիրառած է Ցեղասպանութիւն եզրոյթը:
