15 Յունիս 2016
Ֆրանսուա Հոլլանտ
Վսեմաշուք Նախագահ
Ֆրանսայի Հանրապետութեան
Վսեմաշուք Պրն. Նախագահ
Ռամկավար Ազատական Կուսակցութեան Կեդրոնական Վարչութիւնս սոյն գիրով կու գայ իր շարքայիններուն եւ ընդհանրապէս սփիւռքահայութեան անունով խորին ցաւակցութիւններ յայտնելու Ձեզի, Ձեր երկիրին մէջ պատահած այն ահաբեկչական ոճիրին համար, որուն զոհ գացին ֆրանսացի բարձրաստիճան ոստիկան մը եւ իր կողակիցը:
Խստիւ դատապարտելի այս արարքը քստմնելի ոճիր մըն է, որ կը ցնցէ ոչ միայն ֆրանսացի ժողովուրդը, այլ նաեւ համայն մարդկութիւնը:
Նման դժուարին օրերուն, զորս կը դիմագրաւէ Ֆրանսան, Հայ ժողովուրդի զաւակներուն բարոյական պարտաւորութիւնն է՝ զօրակցիլ իրեն բարեկամ երկիրին մաղթելով, որ նմանօրինակ անմարդկային ոճիր մը վերջինը կ՛ըլլայ, որ կը հարուածէ Ֆրանսան:
Յարգանքներով՝
Ի Դիմաց՝
ՌԱՄԿԱՎԱՐ ԱԶԱՏԱԿԱՆ ԿՈՒՍԱԿՑՈՒԹԵԱՆ
ԿԵԴՐՈՆԱԿԱՆ ՎԱՐՉՈՒԹԵԱՆ
Սեւակ Յակոբեան Սերժիօ Նահապետեան
Ատենադպիր Ատենապետ
