Արցախի Պաշտպանութեան Բանակի հիւսիսային ուղղութեամբ տեղակայուած զօրամասերէն մէկուն մէջ, Մայիս 11-ի երեկոյեան հակառակորդին կողմէ արձակուած կրակոցէն 20-ամեայ Արմէն Հրայրի Մարտիրոսեանը զոհուած է՝ ԵԱՀԿ դիտարկումէն անմիջապէս յետոյ: Այս մասին հաղորդագրութիւն տարածած է ՀՀ պաշտպանութեան նախարարութիւնը:
«Յատկանշական է, որ դէպքը տեղի ունեցած է ԵԱՀԿ առաքելութեան կողմէ նոյն օրը ԼՂՀ Մարտակերտի շրջանին մէջ իրականացած դիտարկումէն ընդամէնը ժամեր անց, որ կը վկայէ, թէ ազրպէյճանական կողմը կ՝արհամարէ ԼՂ խնդիրի կարգաւորման ուղուած միջնորդական ջանքերը եւ հերթական անգամ կը փաստէ՝ միջադէպերու հետաքննութեան մեքենականութիւններու շուտափոյթ ներդրման անհրաժեշտութիւնը», ըսուած է հաղորդագրութեան մէջ:
