*ՍԵՒԱԿ ՅԱԿՈԲԵԱՆ*
«Կոյր հաւատարմութիւնը կամ բացարձակ հնազանդութիւնը կը նշանակէ գիտակցութեան չգոյութիւն», ըսած է անգլիացի գրող Ճորճ Օրուէլ…:
Այս խօսքը միտքս եկաւ, երբ լուրերէն լսեցի, թէ կրօնական կուսակցութիւն մը, որ շրջանի մը ընտրութիւններուն արդիւնքները ի նպաստ իրեն ապահովելու նպատակով՝ ընտրութիւններու մասնակցելու եւ իր զօրակցած ցանկին քուէարկելու «Կրօնական Պարտականութիւն» (Թաքլիֆ Շարիի) յայտարարած է…:
Զարմանալին ալ այն է, որ այդ լուրի թղթակիցին պատրաստած հաղորդագրութեան մէջ, այդ շրջանի հարցադրուող քաղաքացիները առանց ամչնալու եւ առանց մտածելու՝ հեռատեսիլի կայանին նկարչական գործիքին նայելով ամենայն ոչխարամտութեամբ կը հաստատէին, թէ երբ հարցը «Կրօնական Պարտականութիւն» է՝ իրենց կը մնայ բացարձակ հնազանդութիւն…:
Զարմանալի եւ միեւնոյն ժամանակ շա՜տ վտանգաւոր երեւոյթ, որու մասին պէտք է մտածել՝ նամանաւանդ, որ այսպէս կոչուած «թաքլիֆ շարիի»ներով կարելի է՝ Լիբանանի բնակչութեան բաղկացուցիչ տարրերէն ամբողջ համայնք մը ոեւէ առիթով (ընտրական թէ այլ), ոտքի հանել ու նստեցնել՝ երկիրն ալ հետը տակնուվրայ ընելով…:
Բարին Աստուծմէ…:
