Ստեփանակերտի մէջ ամէն ինչ խաղաղ է, հակառակ ազրպէյճանական կողմի այն յայտարարութիւններուն, թէ հնարաւոր է՝ Լեռնային Ղարաբաղի մայրաքաղաքի ռմբակոծումը: Քաղաքին մէջ խուճապ չկայ՝ հակառակ մամուլով տարածուած տեղեկութիւններուն, ըստ որոնց Ստեփանակերտի մէջ խուճապ է եւ մարդիկ տեղափոխուած են ապաստարաններ: Ստեփանակերտի պետական կառոյցները կ’աշխատին արտակարգ դրութեամբ, պաշտպանութեան նախարարութեան, ոստիկանութեան եւ միւս պետական շէնքերը հսկողութեան տակ առնուած են զինուած ոստիկաններու եւ բանակի կողմէ, բայց արտակարգ դրութիւն չկայ քաղաքին մէջ, ուր կեանքը կը շարունակուի բնականոն կերպով: Ստեփանակերտի հնարաւոր ռմբակոծութեան վերաբերեալ յայտարարութիւնը՝ բաւական կոշտ արձագանքի արժանացաւ Լեռնային Ղարաբաղի մայրաքաղաքին մէջ, ուր յայտարարեցին, որ պատրաստ են աւելի ուժեղ պատասխանի, եթէ քաղաքը ռմբակոծուի:
