Հինգշաբթի, 25 Փետրուարին Պօղոս Գ. Կարմիրեան վարժարանի աշակերտները ատենամարզանքի պահուն ականատես եղան աննախընթաց ներկայացումի մը, թէեւ վարժարանէն ներս կազմակերպուող ամէն ատենամարզանք իրայատուկ բնոյթ կ՛ունենայ, սակայն այս շաբթուանը գերազանցեց բոլորին:
Ատենամարզանքը մտայղացումն էր գիտութեան ուսուցչուհի եւ Potentials ակումբի պատասխանատու օրիորդ Հայկօ Տոլմայեանի, որ միշտ սովորականէն տարբեր ներկայացումներով շշմեցուցած է մեզ:
The makers խորագիրով մրցոյթ – յայտագիրը կը ներկայացնէր խումբ մը աշակերտներ, որոնք իրենց հնարած առարկաները պիտի ներկայացնէին, եւ այս առիթով հրաւիրուած էին Տիկին Ցոլինէ Էլմայեան, վարժարանիս նախկին շրջանաւարտ Պարոն Րաֆֆի Չաքրեան եւ Տիկին Դալար Բարդիեան, որպէս դատական կազմ, որոնք պիտի ընտրէին լաւագոյն ստեղծագործութիւնը:
Յայտագիրը սկսաւ Ե. Կարգի աղջիկներու ներկայացուցած հրաշալի պարով, ապա հանդիսավարներ Նարեկ Երեմեան եւ Ալին Պետոյեան (Թ. Կարգ) բեմ հրաւիրեցին դատական կազմի անդամները, որոնք իրենց տեղերը գրաւեցին, իւրաքանչիւրին դիմաց կար համակարգիչ մը, որուն միջոցով պիտի ընէին գնահատականը մասնակից աշակերտներուն:
Նախքան աշակերտին բեմ բարձրանալը, մեծ պաստառի վրայ ցուցադրուեցաւ խտասալիկ մը՝ հակիրճ գաղափար տալու աշակերտին հնարած առարկային մասին եւ այդ խտասալիկի պատրաստութիւնը ստանձնած էին Ճիանի Աստուրեան եւ Մելքոն Մազաքեան, Ը. կարգէն: Ապա հերթաբար բեմ հրաւիրուեցան մասնակիցները եւ ներկայացուցին իրենց գիւտը:
Առաջին մասնակցողն էր Գեղամ Թելվիզեան Զ. դասարանէն, ան շինած էր երկու մասէ բաղկացած աման մը, ուր կարելի է ապուրը եւ ճաշը նոյն պնակին մէջ ուտել:
Երկրորդ մասնակցողը Արթիւր Սիմոնեանն էր, որ շինած էր կարագի յատուկ տուփիկ մը, որուն միջոցով կարելի էր կարագը դիւրութեամբ հացին քսել եւ ուտել:
Քրիսթէլ Եսայեան շինած էր կորեկ պատրաստելու յատուկ կազմած մը, օգտագործելով զովացուցիչի թիթեղը, որուն տակ զետեղած էր մոմ մը, եւ այս ձեւով կարելի պիտի ըլլար որեւէ պահու եւ վայրի մէջ կորեկ համտեսել:
Մէկ այլ հետաքրքրական գաղափար յղացած էին Յակոբ Ճուլֆայեանը, Աննա-Թերեզա Յակոբեանը եւ Դալար Թոսունեանը, որոնք ջուրի կերպընկալ շիշերով շինած էին տնակ մը եւ բացատրեցին, թէ նման տնակներ կարելի է կառուցել պատսպարելու համար սուրիացի գաղթականները:
Կարօ Կիրիթլեանը հնարած էր կազմած մը, որ արեւի ճառագայթով ջուրը կը զտէր, որ ուշագրաւ եւ գնահատելի աշխատանք մըն էր:
Սէրուժ Մարկոսեանը յղացած էր բարդ եւ հետաքրքրական միտք մը, ան շինած էր վերելակի մը մանրակերտը, որ կը բանի ջուրի ճնշումով եւ այս ձեւով կարելի կ’ըլլայ ելեկտրականութիւն խնայել:
Վերջին գիւտարարները՝ Կարօ Նաճարեան, Արման Չերչեան եւ Հրակ Փարթամեան, շինած էին գետինը լուացող եւ մաքրող ինքնաշարժ մը, իրենց մօր տնային աշխատանքը դիւրացնելու միտումով:
Ակնյայտ էր, թէ մասնակից բոլոր աշակերտները լաւապէս պատրաստուած էին եւ քաջատեղեակ իրենց հնարած առարկաներուն, անոնք անվարան եւ ինքնավստահ ձեւով պատասխանեցին դատական կազմի հարցումներուն:
Աւարտին մեծ պաստառի վրայ երեւցան արդիւնքները եւ նիշերու չնչին տարբերութեամբ առաջին հանդիսացաւ Սէրուժ Մարկոսեանը ու ստացաւ նուէր մը:
Վարժարանիս Տնօրէնուհի Տիկին Մարալ Պալեօզեան խօսք առնելով շնորհաւորեց մասնակցող բոլոր աշակերտները եւ յատուկ շնորհակալութիւն յայտնեց Օրիորդ Հայկօ Տոլմայեանին, որ յաջողած էր իր աշխատանքի կողքին գործի մղել նաեւ աշակերտները եւ այդ աշխատանքին արգասիքն է, որ մենք քաղեցինք այսօր ու առ ի գնահատանք Օրիորդ Հայկոյին նուիրեց 3D գրիչ մը, որ իր կարգին նուիրեց Potentials ակումբին:
Յարատեւութիւն եւ յաջողութիւն կը մաղթենք մեր գիտունիկներուն:
