Միջազգային խորհրդատուական Mercer ընկերութիւնը Երեւանը ներառած է՝ կեանքի որակով աշխարհի ամենայարմարաւէտ քաղաքներու ցանկին մէջ: Ինչպէս կը հաղորդէ «Արմէնփրես»-ը, 230 քաղաքներու շարքին Երեւանը գրաւած է 182-րդ տեղը:
Աղիւսակի առաջատարներն են Վիեննան (Աւստրիա), Զիւրիխը (Զուիցերիա), Օքլենտը (Նոր Զելանտա), Միւնիխը (Գերմանիա), Վանքուվըրը (Գանատա), Տիւսելտորֆը (Գերմանիա), Ֆրանքֆորթը (Գերմանիա), Ժնեւը (Զուիցերիա), Քոփենհակընը (Դանիա) եւ Սիտնէյը (Աւստրալիա): Հարեւան Վրաստանի մայրաքաղաք Թիֆլիսը 188-րդն է, Պաքուն` 197-րդ, Թեհրանը` 203-րդ: Թուրքիոյ մայրաքաղաք Անգարան ցուցակի մէջ չէ ներառուած, իսկ Սթամպուլը 122-րդն է:
Ռուսիոյ մայրաքաղաք Մոսկուան 167-րդն է, իսկ ԱՄՆ մայրաքաղաք Ուաշինկթընը` 51-րդը: 230-րդը Իրաքի մայրաքաղաք Պաղտատն է:
Արդէն 18 տարի է, որ Mercer-ը նման վարկանիշային աղիւսակներ կը կազմէ` իբրեւ չափանիշ ընտրելով առողջապահութիւնը, կրթութիւնը, յանցագործութեան մակարդակը, քաղաքական կայունութիւնը, փոխադրամիջոցները, բնութիւնը եւ այլն:
