Մոսկուայի Հայ առաքելական եկեղեցւոյ վանական համալիրի ներքոյ գործող՝ Ռուսաստանի եւ Նոր Նախիջեւանի Հայոց թեմի թանգարանին մէջ բացուած է Ռուսիոյ վաստակաւոր նկարիչ, Ռուսաստանի գեղանկարչութեան ակադեմիայի թղթակից անդամ Եուրի Գրիգորեանի եւ անոր զաւակին` Եուրի Գրիգորեան կրտսերի աշխատանքներու համատեղ ցուցահանդէսը:
Բացման արարողութեան ներկայ եղած է Ռուսիոյ մէջ ՀՀ դեսպան Օլեկ Եսայեան:
Ըստ Artsakhpress.am-ի «Հայրեր եւ որդիներ» խորագիրով ցուցահանդէսին ներկայացուած են աւելի քան 40 գեղանկարներ, ներառեալ հայկական թեմայով աշխատանքներ եւ անուանի հայերու դիմանկարներ:
Ներկայիս հայր եւ որդի Գրիգորեաններու աշխատանքները ցուցադրուած են նաեւ Ռուսիոյ Թրեթեաքովի պետական պատկերասրահին, Մոսկուայի ժամանակակից արուեստի թանգարանին, Արեւելքի ժողովուրդներու մշակոյթի թանգարանին եւ Հայաստանի ազգային պատկերասրահին մէջ:
