Լրատուական տեղեկութիւններ նշեցին, որ Հայաստանի կրթութեան եւ գիտութեան նախարար Արմէն Աշոտեան պիտի ազատուի իր պաշտօնէն եւ անոր պիտի փոխարինէ ՀՅԴ-ի թեկնածու Լեւոն Մկրտիչեան: Վերջինս նախապէս երեք առիթներով ստանձնած է կրթութեան նախարարութիւնը: Այս փոփոխութիւնը եթէ հաստատուի, մաս պիտի կազմէ Հայաստանի Հանրապետական կուսակցութեան եւ Դաշնակցութեան միջեւ իշխող դաշինքի ձեւաւորման համաձայնութեան: Կը կարծուի, որ այդ մասին պիտի յայտարարուի Հանրապետական կուսակցութեան խորհուրդի կայանալիք նիստէն ետք: Նաեւ կը շրջանառուի, որ տնտեսութեան նախարար Կարէն Ճշմարիտեանին պիտի փոխարինէ Դաշնակցական Արծուիկ Մինասեան: Նշենք, որ բանակցութիւններ կ’ընթանային նաեւ արդարադատութեան եւ տարածքային կառավարման նախարարութիւններու շուրջ:
