Կարմիր Խաչի միջազգային կազմակերպութիւնը պաշտօնական տեղեկութիւններ չունի Ազրպէյճանի մէջ մեծաթիւ հայ գերիներու մասին: Այս մասին յայտարարեցին կազմակերպութեան Երեւանի պատուիրակութեան պատասխանատուները: Ազրպէյճանի փախստականներու եւ տեղահանուածներու հարցերով պետական յանձնաժողովի նախագահ Ալի Հասանով յայտարարած էր, որ իրենց մօտ մեծաթիւ հայ գերիներ կան: «Կարմիր Խաչի տուեալներով, այս պահուն Ազրպէյճանի մէջ կայ մէկ հայ ռազմագերի: Մեր ներկայացուցիչները կ’այցելեն անոր, ան հնարաւորութիւն ունի հարազատներուն հետ ընտանեկան բնոյթի տեղեկութիւններ փոխանակելու: Այլ գերիներու մասին պաշտօնական տեղեկութիւններ Կարմիր խաչը չունի», ըսին Երեւանի պատուիրակութենէն: Նշենք, որ միակ գերին Արցախի քաղաքացի Արսէն Պաղտասարեանն է:
