2016 թուականին կը նախատեսուի միջազգային մեծ օդանաւային ընկերութիւններու մուտքը հայաստանեան շուկայ: Այս մասին «Արմէնփրես»ի մամուլի սրահին մէջ հրաւիրուած ասուլիսին նշած է՝ ՀՀ Տնտեսութեան նախարարութեան քաղաքացիական օդային քաղաքականութեան եւ տնտեսական կարգաւորման վարչութեան պետ Աննա Չոպանեան:
Անոր խօսքով այս տարի բանակցութիւններ վարած են մօտ 30 օդանաւային ընկերութիւններու հետ, արդիւնքները արդէն ակնյայտ են: «Հայկական շուկայ վերադարձած են երկու խոշոր օդանաւային ընկերութիւններ` չեխական «Չեխ էյրլայնզ»ը եւ լեհական «LOT»-ը: Անոնցմէ բացի առարկայական բանակցութիւններ կը վարուին «Քաթար էյրուէյզ» մեծ օդանաւային ընկերութեան հետ, որու մուտքը Հայաստանի շուկայ կը նախատեսուի 2016ի սկզբը: Բանակցային գործընթացը մօտեցած է աւարտին», ըսած է Աննա Չոպանեան:
Քանի մը օդանաւային ընկերութիւններու հետ ալ բանակցութիւնները կը շարունակուին: Այս տարի բանակցութիւններ վարած են 26 պետութեանց իշխանութիւններու հետ միջկառավարական համաձայնագիրերու վերանայման ուղղութեամբ: Աննա Չօպանեանի խօսքով, 14 պետութեանց հետ քաղաքացիական օդային ոլորտի մէջ իրաւական դաշտը ազատականացուած է:
