Հայոց Ցեղասպանութեան թանգարան-հիմնարկի նոր ու համալրուած ցուցադրութեան, 2015ին ծանօթացած են մօտ 72 հազար այցելուներ: «Արմէնփրես»ի փոխանցմամբ այս մասին լրագրողներու հետ տարեվերջի հանդիպման ժամանակ տեղեկացուցած է՝ Հայոց Ցեղասպանութեան թանգարան-հիմնարկի փոխտնօրէն Լուսինէ Աբրահամեան:
«Տարին աննախադէպ էր թուրք այցելուներու քանակով: Այս տարի թանգարանի վերաբացումէն յետոյ, թանգարան այցելած են Թուրքիոյ 1000 քաղաքացիներ», ըսած է Լուսինէ Աբրահամեան: Անոր խօսքով տարբեր երկիրներէ թանգարան այցելած են մօտ 71 պատուիրակութիւններ, որոնց մէջ Ապրիլ 24ին Հայոց Ցեղասպանութեան զոհերու յիշատակը յարգելու եկած Ռուսիոյ, Ֆրանսայի, Կիպրոսի եւ Սերպիոյ նախագահներուն գլխաւորած պատուիրակութիւնները:
Այս տարի Հայոց Ցեղասպանութեան յուշահամալիր եւ թանգարան-հիմնարկ այցելած են՝ Հայաստանի ու Սփիւռքի 16 հազար աշակերտներ եւ ուսանողներ:
