ՀՀ Մշակոյթի նախարարութիւնը 2015ին սկսած է հայկական շարժանկարներու թուայնացումը: Այս մասին ըստ News.am-ի, Դեկտեմբեր 25ի մամուլի ասուլիսի ժամանակ յայտնած է ՀՀ մշակոյթի փոխնախարար Արթուր Պօղոսեան:
Փոխնախարարին խօսքով արդէն 16 հայկական շարժանկարներ ամբողջովին թուայնացուած են: «Մեզի համար շատ կարեւոր է պահպանել այդ ժառանգութիւնը ու մենք 2016ին կը շարունակենք թուայնացումը», շեշտած է Արթուր Պօղոսեան: Հայաստանի կառավարութիւնը ըստ Պօղոսեանի, կը փորձէ արտօնեալ պայմաններ ապահովել շարժանկարի արտադրութեան համար: «Մենք կը խրախուսենք համատեղ շարժանկարի արտադրութիւնը», աւելցուցած է Արթուր Պօղոսեան:
Փոխնախարարին խօսքով 2015ին ընդհանուր առմամբ իրականացած են շարժանկարի 15 նախագիծեր (չորսը դեռ ընթացքի մէջ են), որոնց ծիրէն ներս նկարահանուած են 15 լիամեթր ու 10 կարճամեթր, 1 սկզբնային եւ 1 ուսանողական շարժանկարներ: «Հայաստանի մարզերու եւ Լեռնային Ղարաբաղի մէջ կատարուած են՝ «Հայկական էսքիզներ» ընդհանուր անուանումով կարճամեթրաժ ֆիլմերու նկարահանման աշխատանքներ, նաեւ կայացած է «Անահիտ» գծանկարային շարժանկարի շնորհանդէսը», նշած է Արթուր Պօղոսեան:
