Ամերիկեան յայտնի Keeping Up With Kardashians հեռատեսիլային իրապատումի աստղ Քիմ Քարտաշեանի եւ աշխարհահռչակ ռեփըր Քանիէ Ուեսթի նորածին որդին պիտի մկրտուի Երուսաղէմի հայկական Սուրբ Յակոբ եկեղեցւոյ մէջ:
Ըստ «Արմէնփրես»ի այս մասին կը գրէ «Իսրայէլ Նասիոնալ Նիւզ»ը` նշելով, որ Սէինթ Ուեսթը պիտի ըլլայ ընտանիքին երկրորդ զաւակը, որ պիտի մկրտուի Երուսաղէմի հայկական եկեղեցւոյ մէջ, քանի որ 2015ի Ապրիլին հոն մկրտուած էր անոնց դուստրը` Նորթը:
Իսրայէլեան լրատուամիջոցը կը գրէ, որ Սէինթ Ուեսթը, որ 25 տոկոսով հայ է, ծնած էր Դեկտեմբերի սկիզբը, որմէ ետք Լոնտոնի «Տէյլի Մէյլ»ը յենելով անանուն աղբիւրի մը վրայ տեղեկացուցած էր, որ զոյգը կը պատրաստուի հայկական եկեղեցւոյ մէջ մկրտել երախան:
Կը հաղորդուի, որ Քիմն ու Քանիէն մտադրած էին սենեակ ապահովել Երուսաղէմի Waldorf Astoria պանդոկին մէջ, սակայն երբ այդ մասին յայտնի դարձած է հանրութեան, անոնք պանդոկը փոխած են: Իսրայէլեան անվտանգութիւն ապահովող ընկերութիւններէն մէկը, որ մասնագիտացած է VIP անձերու սպասարկելու ոլորտին մէջ, արդէն վարձուած է յայտնի զոյգին համար:
