Պաշտօնական Պրիւքսէլ յայտարարեց Հայաստանի եւ Եւրոպական Միութեան (ԵՄ) միջեւ, նոր իրաւական փաստաթուղթի շուրջ բանակցութիւններուն պաշտօնական մեկնարկը:
Եւրոպական Միութեան դիւանագիտութեան եւ անվտանգութեան հարցերով բարձր ներկայացուցիչ Ֆետերիքա Մոկերինին, աշխատանքային այցով Պրիւքսէլ գտնուող Հայաստանի արտաքին գործոց նախարար Էտուարտ Նալպանտեանին հետ հանդիպումէ ետք յայտարարեց, թէ բանակցային նոր փուլին մեկնարկը առիթ է փակելու անորոշութեան էջը, որ ի յայտ եկաւ 2013 թուականէն յետոյ, կը հաղորդէ «Ազատութիւն» ձայնասփիւռի կայանը:
«Հայաստանի եւ Եւրոպական Միութեան միջեւ 3.5 տարուայ բարդ աշխատանքը այսպիսով չի վատնուիր: Անիկա պիտի դառնայ մեր նոր յարաբերութիւններուն հիմքը», յայտարարեց Մոկերինին:
Իր հերթին Էտուարտ Նալպանտեան նշեց. «Հայկական կողմը վաղուց իր պատրաստակամութիւնը արտայայտած է՝ Եւրոպական Միութեան հետ շրջանակային համաձայնագիրի շուրջ բանակցութիւնները սկսելու վերաբերեալ, որ ըստ արժանւոյն կ՛արտացոլացնէ մեր համագործակցութեան խորութիւնն ու էութիւնը: Մենք ուրախ ենք, որ մեր յարաբերութիւններու իրաւական նոր հիմքի շուրջ բանակցութիւններ սկսելու Եւրոպական Միութեան խորհրդի որոշումը՝ մեզի հնարաւորութիւն կու տայ առաջ երթալու այս ճամբով»:
Յիշեցնենք, որ այս տարուան Հոկտեմբերին Եւրոպական Միութեան անդամ 28 պետութիւններ Լիւքսեմպուրկի մէջ հրամանագիր ստորագերցին՝ Հայաստանի եւ Եւրոպական Միութեան միջեւ նոր համաձայնագիր ստորագրելու շուրջ բանակցութիւններ սկսելու: Նոր փաստաթուղթը, որ կը փոխարինէ այժմ գործող Հայաստան-ԵՄ գործընկերութեան եւ գործակցութեան համաձայնագիրը, Մոկերինիի խօսքով հիմնուած պիտի ըլլայ մարդու իրաւունքներու, ժողովրդավարութեան եւ օրէնքի գերակայութեան սկզբունքներու վրայ:
Ըստ Եւրոպական Միութեան դիւանագիտական գերատեսչութեան ղեկավարին` նոր համաձայնագիրը, որուն անուանումը դեռ յստակ չէ, կը միտի բարենպաստ պայմաններ ստեղծել՝ կողմերու միջեւ աւելի ամուր համագործակցութեան համար: Խօսքը մասնաւորաբար փոխադրամիջոցներու, բնապահպանութեան եւ ուժանիւթի բնագաւառներու մասին է, ընդգծած է Մոկերինին:
Եւրոպական Միութեան հետ ընդելուզման համաձայնագիր ստորագրելէ հրաժարած պաշտօնական Երեւանը, Պրիւքսէլի հետ մերձեցման փորձեր կ՛ընէ արդէն՝ որպէս Քրեմլինի նախաձեռնած Եւրասիական տնտեսական միութեան անդամ: ԵՄ ընդլայնման եւ հարեւանութեան հարցերով յանձնակատար Եոհանես Հան, Պրիւքսէլի մէջ լրագրողներու հետ հանդիպման ժամանակ յիշեցուց, որ փաստաթուղթը, որու ծիրէն ներս կողմերը կը պատրաստուին բանակցելու, Հայաստանը պէտք է նախաստորագրէր 2013-ին Վիլնիւսի մէջ:
