Թուրքիոյ հայկական համայնքը մեծ յաղթանակ կը համարէ 175 օրուան դիմադրութենէ ետք, «Քամփ Արմէն» («Արմէն ճամբար») անունով յայտնի հայկական որբանոցի տարածքի վերադարձը Կետիկփաշայի Հայ աւետարանական եկեղեցւոյ հիմնադրամին:
Սթամպուլի հայկական «Ակօս» պարբերականի փոխանցմամբ, այս առնչութեամբ համայնքի շատ անդամներ իրենց գոհունակութեան խօսքը յայտնած են:
«Ուրախ ենք: Մեր իրաւունքն է ուրախանալ: Ամուսինս 1996 թուականէն ի վեր այս մասին կը խօսէր: «Նոր Զարթօնք»ին եւ դիմադիրութեան բոլոր աջակցողներուն, բոլոր այդ քաջ մարդոց շնորհակալութիւն կը յայտնեմ… խումբ մը խլուած գոյք ունինք: Յուսով եմ, որ սա բոլորին համար նախադէպ կ՛ըլլայ: Ցեղասպանութեան 100րդ տարելիցին կատարուածը առանձնայատուկ նշանակութիւն ունի», ըստ «Արցախփրես»ի ըսած է է Հրանդ Տինքի այրին` Ռաքել Տինք:
Կետիկփաշայի հայ աւետարանական եկեղեցւոյ հիմնադրամի հոգեւոր հովիւ Գրիգոր Աղապալօղլուն յայտնած է, որ իրենք պիտի վերակենդանացնեն «Քամփ Արմէն»ը: Ան աւերակ վիճակի մէջ է: Հին յիշողութիւնները պահպանելով` նոր կարգաւորումներ պիտի իրականացնենք: Կրկին նոյն նպատակով պիտի օգտագործենք», ըսած է Աղապալօղլուն աւելցնելով, որ ան պիտի օգտագործուի Թուրքիոյ հայ համայնքի երախաներուն համար:
Հայկական որբանոցի վերադարձը կարեւոր քայլ կը համարէ նաեւ՝ քրտամէտ ժողովուրդներու ժողովրդավարական կուսակցութեան կողմէ խորհրդարանական ընտրութիւններուն առաջադրուած Կարօ Փայլանը: «Լաւ լուր է` այս վատ օրերուն: Սա կարեւոր է նաեւ այն տեսանկիւնէ, որ Հրանդ Տինքի հոգին կ’ուրախանայ. կատարուածը անոր ամենամեծ պահանջներէն էր: Հայկական համայնքի տեսնակիւնէն ալ յուսադրող քայլ էր: Սա այնտեղ հերթապահութիւն ընող երիտասարդներուն, հայ համայնքին եւ աջակցութիւն ցուցաբերած ժողովրդավարական ուժերու յաջողութիւնն է», նշած է Փայլան` աւելցնելով, որ կատարուածը նախադէպ կրնայ ըլլալ բռնագրաւուած հայկական այլ գոյքերու վերադարձին համար:
Կետիկփաշայի հայկական որբանոցին կից «Քամփ Արմէն» ամառնային որբանոցը կառուցուած է հայ որբերու աշխատանքով: Ճամբարին մէջ բնակող երախաները մասնակցած են շինարարական աշխատանքներուն: Անոնք ծովէն կրած են աւազ, որմով ալ կառուցուած է ճամբարը:
Ինչպէս նախապէս անդրադարձած ենք, «Քամփ Արմէն» որբանոցը թրքական պետութեան որոշումով փակուած է 1983 թուականին: Իշխանութիւնները որբանոցի վերանորոգումը երբեք թոյլ չեն տուած, որու պատճառով անիկա կը գտնուի անմխիթար վիճակի մէջ: Թուրքիոյ մէջ 2011թուականին օրէնք ընդունուած է ազգային փոքրամասնութիւններուն պատկանող հիմնադրամներու` 79 տարի բռնագրաւուած անշարժ գոյքը վերադաձնելու մասին, սակայն Կետիկփաշայի հայկական որբանոցին կից այդ ամառնային ճամբար-մանկատունը, չէ ընդգրկուած օրէնքով վերադարձման ենթակայ գոյքի ցուցակին մէջ: 5.552 հազար քմ. տարածք ունեցող որբանոցը 1974 թուականին այդ տարածքը գնած կապալառուի կողմէ բացուած դատական գործընթացի արդիւնքով կցուած է՝ զարտուղի ճանապարհով ճամբարի տարածքը գնուած 600 քմ.ին: 1977 թուականին փոքրամասնութիւններու հիմնադրամներու մասին ընդունուած նոր օրէնքով հայ որբերու ճամբարը բռնագրաւուած է:
Սթամպուլի մէջ 6 Մայիսին նոր սեփականատէրը սկսած էր քանդելու հայ որբերու ամառնային որբանոցը: Անոր դէմ դուրս ելան «Նոր Զարթօնք» կազմակերպութիւնը եւ այլ անհատներ ու կազմակերպութիւններ՝ կասեցնելու համար որբանոցի շէնքի կործանումը: Ներկայիս որբանոցի շէնքի քանդումը մասամբ դադրեցուած է: Շինութեան վրայ տարբեր պաստառներ փակցուած են եւ գրութիւններ կարատուած: «Քամփ Արմէն»ի տարածքին մշտական մարդկային հերթապահութիւն սահմանուած է: Հակառակ ատոր` երկու անգամ անյայտ անձիք փորձեցին յարձակիլ որբանոցի տարածքին մէջ հերթապահողներուն վրայ: Դիմադրութեան 175րդ օրը միայն՝ «Քամփ Արմէն»ը վերջնականապէս վերադարձուեցաւ հայկական համայնքին:
