Երեքշաբթի, Սեպտեմբեր 15-ին, Հրանդ Տինքի ծննդեան 61-րդ տարեդարձին օրը, Պոլսոյ մէջ տեղի կ՚ունենար նահատակ հայ լրագրողին անունը կրող միջազգային մրցանակաբաշխութեան հանդիսաւոր արարողութիւնը, որու ընթացքին, մրցանակները 7-րդ անգամ ըլլալով կը գտնէին իրենց դափնեկիրները:
Այս տարուան մրցանակին արժանի նկատուած են Սաուտական Արաբիոյ մէջ կիներու իրաւունքներու պաշտպանութեան համար պայքար մղող Սամար Պատաուի եւ Թուրքիոյ մէջ՝ միասեռականներու եւ այլասեռականներու իրաւանց պաշտպան Kaos GL կազմակերպութիւնը:
Բացման իր խօսքին մէջ, ծանօթ պատմաբան Թանէր Աքչամ անգամ մը եւս կրկնած է, որ «մարդկային իրաւունքի» եւ «մարդկութեան դէմ ոճիրներ» արդարադատական ծանօթ եզրերը եւ անոնցմէ բխած՝ «ցեղասպանութիւն» բնութագրումը ուղղակի առընչուած են Թուրքիոյ պատմութեան հետ: “Բնաջնջուածներու արժանապատւութիւնը վերադարձնելու, արդարութեան եւ խղճի զգացումը վերահաստատելու, թշնամութեանց եւ հակամարտութիւններու առաջքը առնել կարենալու համար հարկ է Պատմութեան հետ առերեսիլ” ընդգծած է ան:
Շարունակելով, ծանօթ պատմաբանը ըսած է, թէ “այս հողերուն վրայ աղէտներու եւ քայքայումներու պատճառ դարձած՝ ազգային հիմքերու յենող լուծումի փորձերը, սպառազինման եւ սպանութիւններէ շատ աւելի դիւրին՝ կենակցութեան միջոցով կարելի է յաղթահարել եւ այդ տեսլականին համար՝ պէտք է ապրեցնել քաղաքացիական իրաւունքներու առաջատար Հրանդ Տինքը”։
Ցուցադրուած են փաստագրական ժապաւէններ, գործադրուած է գեղարուեստական յայտագիր մը:
