Հայոց Ցեղասպանութեան 100-րդ տարելիցի նշումներու ծիրէն ներս, նախաձեռնութեամբ Իրաքահայ Թեմի Հայոց Ցեղասպանութեան 100-րդ տարելիցի յանձնախումբին, Օգոստոս 22-ին տեղի ունեցած է Իրաքահայ վաստակաւոր գեղանկարիչ Անդրանիկ Օհաննէսեանի նկարներու անհատական ցուցահանդէսը, որ կը ներկայացնէ Ցեղասպանութիւնը խորհրդանշող հարիւր իւղանկարներ: Այս մասին ըստ «Հայերն Այսօր»ի, կը հաղորդէ Արամ սրկ. Քէթէնճեան:
Ցուցահանդէսը, որ հովանաւորուած է Իրաքահայ թեմի առաջնորդ Գերաշնորհ Տ. Աւագ արքեպիսկոպոս Ասատուրեանի կողմէ, տեղի ունեցած է Պաղտատի առաջնորդանիստ Ս. Գրիգոր Լուսաւորիչ եկեղեցւոյ համալիրէն ներս` նորակառոյց շէնքի դահլիճին մէջ:
Իրաքահայ Թեմի պատասխանատուներու եւ յանձնախումբերու կողքին, այդ ձեռնարկին ներկայ եղած են Իրաքի մէջ ՀՀ արտակարգ եւ լիազօր դեսպան Կարէն Գրիգորեան, տարբեր մասնագիտութեամբ տեղացի մտաւորականներ, բժիշկներ եւ արուեաստագէտներ, Իրաքի Քրիստոնէից եւ այլ Կրօններու Տնօրէնութեան ներկայացուցիչը, հայ եւ դաւանակից եկեղեցիներէն հոգեւոր հայրեր, թեմի կեդրոնական վարչութեան անդամները եւ մեր զաւակներէն հոծ բազմութիւն, ինչպէս նաեւ քանի մը հեռուստաալիքներու լրագրողներ, որոնք արձանագրած են օրուան ձեռնարկը եւ հարցազրոյցներ կատարած:
Ձեռնարկի աւարտին վերոյիշեալ համալիրէն ներս գտնուող ազգային Վարժարանի Կիւլպէնկեան սրահին մէջ, հայ եւ օտար անձաւորութիւններու բաժնուած են օրուան համար պատրաստուած յատուկ յուշանուէրներ:
Յիշատակութեան արժանի է, որ այս ցուցահանդէսը գեղանկարիչ Անդրանիկ Օհաննէսեանի անհատական տասներորդ ցուցահանդէսն է:
