Փետրուար 1-ին Ախալցխայի Հայկական Երիտասարդական Կրթամշակութային Կեդրոնին մէջ նշեցին հայոց բանակի տօնը: Այս մասին կը հաղորդէ «Akhaltskha.net»ը:
Ձեռնարկը մեկնարկեց Հայր Յակոբ աբեղայի տէրունական աղօթքով, որմէ ետք երիտասարդները խումբով երգեցին Հայաստանի պետական օրհներգը: Ներկաները մէկ վայրկեան լռութեամբ յարգեցին վերջին շրջանին Հայաստանի ու Ղարաբաղի սահմաններուն վրայ զոհուած զինուորներուն յիշատակը:
Ձեռնարկի ընթացքին երիտասարդները երգեցին հայրենասիրական երգեր, ինչպէս նաեւ արտասանեցին հայոց բանակին նուիրուած բանաստեղծութիւններ ու խօսեցան հայոց բանակի անցած ճանապարհին մասին:
Հայոց բանակին նուիրուած ձեռնարկը աւարտեցաւ հայկական պարերով:
Յիշեցնենք, որ հայոց բանակին նուիրուած ձեռնարկներ իրականացած են նաեւ Ախալքալաքի ու Նինոծմինտայի երիտասարդական կեդրոններուն մէջ:
