*ԼԻԱՆԱ ՄԱԿՈՒԵՑԵԱՆ* 2014թ. Մայիսի սկզբին Գաւառում մեկնարկեցին «Մետաղադրամն Անապատում» ֆիլմի նկարահանման աշխատանքները: Այն լիամետրաժ պատմագեղարուեստական ֆիլմ է, որի սցենարի հեղինակներն են ԱՄՆ քաղաքացի, բարեգործ, «Քրիստոնէութիւնը Հայաստանի Խաչմերուկներում» գրքի հեղինակ Ռոբերտ Բեքման Բրինը եւ Արփի Աղոյեանը:
Ֆիլմի հիմքում 1915 թուականին Օսմանեան կայսրութիւնում տեղի ունեցած պատմական իրադարձութիւններն են, հայ ժողովրդի գաղթն ու Ցեղասպանութիւնը:
Ֆիլմի ստեղծման գաղափարը ծնուել է 2014 թուականին, Ամանորի նախօրէին: Ֆիլմի նկարահանման աշխատանքները սկսուել են Հայաստանում, նկարահանումները կատարուել են Երեւան եւ Գաւառ քաղաքներում, Սեւանայ լճի մերձակայքում, Կարմիր գիւղ, Դալարիկ, Տաթեւ գիւղերում, իսկ Օգոստոս ամսից կը շարունակուեն ԱՄՆում:
Մօտ չորս տասնեակ դերասաններ իրենց ժամանակն ու տաղանդն են ներդրել Հայոց Ցեղասպանութիւնը միջազգային հանրութեանը լսելի դարձնելու համար: Ֆիլմի գլխաւոր դերերում դերասաններ Մարտուն Ղեւոնդեանն ու Բիւրեղիկ Մնէյեանն են: Գլխաւոր հերոսուհուն՝ Սառա Սենդերսին, մարմնաւորում է Արփի Աղոյեանը:
Հայոց Ցեղասպանութեանը նուիրուած «Մետաղադրամն Անապատում» ֆիլմը մեծ էկրան կը բարձրանայ 2015 թուականի Ապրիլի 24ին, երբ միջազգային հանրութիւնն ու աշխարհի հայութիւնը նշեն ողբերգութեան 100րդ տարելիցը: Ըստ Ռոբերտ Բրինի՝ ֆիլմն ուսուցողական, տեղեկատուական միջոց է, որը մի փոքր քայլ կը լինի դէպի Հայոց Ցեղասպանութեան ճանաչումը:
«Թէեւ ֆիլմի պրիմիերան կայանալու է Հայաստանում, սակայն այն նախատեսուած է Հայաստանից դուրս գտնուող անգլախօս հանրութեան համար, որոնցից շատ քչերն են տեղեկացուած Հայաստանի պատմական ողբերգական իրողութեան մասին: Թոյլ չտանք, որ եւս 100 տարի անցնի՝ առանց արդարութեան ճանաչման», իր խօսքում նշեց Բրինը:
Հարցազրոյցի վերջում Ռոբերտը յոյս յայտնեց, որ մինչ 2015 Ապրիլի 24ը ֆիլմը կը գրաւի հովանաւորների ուշադրութիւնը:
www.hetq.com
