Օգոստոսի 30-ին` 2022-2023 թթ. ուսումնական նոր տարեշրջանին ընդառաջ, Սուրբ Գայիանէ վանքում, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, տեղի ունեցաւ կրթութեան մշակների օրհնութեան կարգ: Կրթական ոլորտի երախտաւորների օրհնութեան աւանդութեան սկիզբը դրուել է 2010 թուականին:
Արարողութեանը ներկայ էին ՀՀ ԳԱԱՅ նախագահ Աշոտ Սաղեանը, կրթական կառոյցների ներկայացուցիչներ, Բուհ-երի ռեկտորներ, մարզային կրթութեան վարչութիւնների ղեկավարներ, ՀՀ մի շարք դպրոցների տնօրէններ եւ մանկավարժներ:
Oրհնութեան կարգի աւարտին Ամենայն Հայոց Կաթողիկոսն իր հայրապետական օրհնութիւնն ու գնահատանքը փոխանցեց կրթութեան ոլորտի երախտաւորներին` նշելով, որ այսօր նրանց համար հաւատքի վերանորոգութեան, մեր սուրբ հայրերի հոգեմտաւոր վեհ գործի հանդէպ հաւատարմութեան վերահաստատման եւ ուխտի օր է:
«Աստուածահաճոյ եւ գովարժան է ձեր աշխատանքը, սիրելի՛ մանկավարժներ, կրթական գործի սիրելի մշակներ, քանզի հակառակ ժամանակի բազում խոչընդոտներին եւ դժուարութիւններին` անմնացորդ սիրով եւ անօրինակ նուիրումով շարունակում էք մեսրոպաշունչ ձեր առաքելութիւնը` հաւատալով գիտելիքի ուժին, աշխարհը վերափոխող ու գեղեցկացնող կրթեալ, բանիմաց եւ առաքինի անհատների պատրաստութեան կարեւորութեանը»,–ասաց Ամենայն Հայոց Հովուապետը` յորդորելով կրթութեան մշակներին ամենայն պատասխանատուութեամբ եւ բարձր գիտակցութեամբ շարունակել իրենց առաքելութիւնը, ներշնչող եւ խանդավառող օրինակ լինել սաների համար եւ հայորդիների մէջ սերմանել սեր միմեանց հանդէպ, բարու եւ արդարութեան հանդէպ, կրթել աստուածպաշտութեան եւ հայրենասիրութեան ոգով:
Նորին Սրբութիւնը հաստատեց, որ Հայոց Եկեղեցին հոգեփրկչական իր ծառայութեանը համընթաց շարունակելու է ազգապահպան առաքելութիւնը հայ ժողովրդի կեանքում` Հայաստանում, Արցախում եւ սփիւռքի բոլոր համայնքներում մշտապէս զօրաւիգ լինելով նաեւ կրթօջախներին, մանկավարժներին եւ կրթական բարեփոխումներին, որոնք ուղղուած կը լինեն կրթելու եւ դաստիարակելու ազգային ինքնութեան բարձր գիտակցութեամբ եւ բարոյական ամուր նկարագրով սերունդներ:
Ինքնութեան ու ազգային դիմագծի պահպանման գործում կարեւորելով ժամանակին համահունչ կրթութիւնն ու ազգային, հոգեւոր դաստիարակութիւնը` Ամենայն Հայոց Կաթողիկոսն ընդգծեց․ «Այս հաստատ համոզումով է դարերի հոլովոյթում Հայոց Եկեղեցին կեանքի կոչել կրթադաստիարակչական իր առաքելութիւնը` բիւրեղացնելով մեր ժողովրդի հոգին, որը մշտապէս բաց է եղել աշխարհի առաջ, բայց միեւնոյն ժամանակ կառչած իր հաւատքին ու նախնեաց աւանդներին: Նոյն առաքելութեանն է կոչուած նաեւ ժամանակի փորձութիւնները յաղթահարած «հայոց Եկեղեցու պատմութիւնէ առարկան, որն անկախութիւնից յետոյ կրթական ասպարէզի ամենակարեւոր ձեռքբերումներից է` ազգօգուտ բարի պտուղը Եկեղեցի-պետութիւն գործակցութեան եւ հետեւողական բազմամեայ աշխատանքի: Առարկայի միջոցով ջամբուող արժէքները բոլոր ժամանակներում եղել են մեր ժողովրդի գոյութեան եւ յարատեւութեան յենասիւնը, երբեմն աներեւոյթ, սակայն մշտապէս ամուր եւ անխորտակելի պատուարը ազգային ինքնագիտակցութեան: Այս առարկայի ամբողջական դասաւանդումը հանրակրթական դպրոցներում, ազգային կրթութեան պարտադիր տարրի պատշաճ ապահովումը բարձրագոյն կրթութեան մէջ պէտք է դառնան ամէնքիս եւ յատկապէս` հայրենի պետութեան հոգածութեան առարկան, եթէ կամենում ենք ունենալ իրական արժէքներով սնուցուող անկախ պետականութիւն, կառուցել մեր նախնիների երազած շէն ու հզօր հայրենին, որի զաւակները հասակ կ’առնեն հոգեմտաւոր մեր ժառանգութեան համակարգային իմացութեամբ եւ ճանաչողութեամբ: Միմիայն այս ճանապարհով կը կարողանանք պահպանել ազգային մեր դիմագիծը եւ երաշխաւորել ազգիս երթը դէպի նոր հազարամեակներ»:
Վերջում Նորին Սրբութիւնը, կրթութեան մշակներին մաղթելով բարի, խաղաղ եւ պտղաբեր ուսումնական նոր տարի, հայցեց Երկնաւորից, որ այն դառնայ յաջութիւնների եւ նորանոր ձեռքբերումների ժամանակաշրջան, որպէսզի Տիրոջով զօրացած` անսպառ եռանդով, նուիրումով եւ պատասխանատուութեամբ շարունակեն լուսաւորել, կրթել եւ դաստիարակել մեր ժողովրդի զաւակներին:
Արարողութեան աւարտից յետոյ ի պատիւ հրաւիրեալների տեղի ունեցաւ ընդունելութիւն:
