Ուրբաթ, 07. 10. 2022

Մեթնի Ընտրաշրջանի Հայ Առաքելական Համայնքի Աթոռի Թեկնածու Տոքթ. Արա Պարտաքճեան Թէքէեան Կեդրոնի Մէջ ՌԱԿ Պաշտօնապէս Կը Զօրակցի Իր Թեկնածութեան

Երկուշաբթի 25 Ապրիլ 2022ին յետմիջօրէին,  Լիբանանի յառաջիկայ երեսփոխանական ընտրութիւններու Մեթնի շրջանի Հայ առաքելական համայնքին յատկացուած աթոռին թեկնածու՝ Տոքթ. Արա Պարտաքճեան պաշտօնական այցելութիւն մը տուաւ Թէքէեան Կեդրոն: Տոքթ. Պարտաքճեանին կ՛ընկերակցէին պարոնայք Հանի Սալիպա (ցանկակից թեկնածու) եւ Ժիլպէր Ռիզք (Պրն. Սալիպայի մամլոյ խօսնակ):

Յարգելի հիւրերուն դիմաւորեցին, Ռամկավար Ազատական Կուսակցութեան Լիբանանի Շրջանային Վարչութեան փոխ-ատենապետ՝ Ընկ. Տոքթ. Յակոբ Փափազեան, ՌԱԿ-ի պետական նախկին երեսփոխան եւ ԹՄՄ Հիմնադիրներու Մարմնի ատենապետ՝ Ընկ. Յակոբ Գասարճեան, ՌԱԿ-ի ընտրական գրասենեակի համակարգող՝ ընկ. Ստիւ Նոխուտեան եւ ՌԱԿ Լիբանանի Շրջանային Վարչութեան անդամ ընկերուհիներ եւ ընկերներ: 

Մտերմիկ հանդիպման մը ընթացքին կողմերը քննարկեցին Լիբանանը յուզող հարցեր:

Տոքթ. Պարտաքճեան ՌԱԿ-ի ղեկավարութեան փոխանցեց ընտրական իր ծրագիրը:

Հանդիպման արդիւնքով ՌԱԿ Լիբանանի Շրջանային Վարչութիւնը որոշում կայացուց պաշտօնապէս զօրակցիլ Տոքթ. Արա Պարտաքճեանի թեկնածութեան, իր ամբողջական նեցուկը շնորհելով անոր:

Նշենք, թէ Տոքթ. Պարտաքճեան Մայիս 15ի ընտրութիւններուն ընտրապայքարը կը մղէ Լիբանանեան ուժեր կուսակցութեան Մեթնի ցանկին ընդմէջէն եւ ան պիտի մրցի նոյն աթոռին համար ՀՅԴ-ի եւ այլ հայ թեկնածուներուն դէմ:

ՆՄԱՆ ՆԻՒԹԵՐ

Մեկնաբանէ՛

Խնդրում ենք այստեղ մուտքագրել Ձեր մեկնաբանութիւնը։
Խնդրում ենք այստեղ մուտքագրել Ձեր անունը։

spot_img

ՎԵՐՋԻՆ ՅԱՒԵԼՈՒՄՆԵՐ

Զօրակցիր Զարթօնք Օրաթերթին