ՀԵԸ-Ի Զոյգ Խումբերը Յաղթանակով Սկսան Լիբանանի 18-Էն Վար Տարիքային Ախոյեանութեան Մրցումները
Շաբաթավերջին սկսան Լիբանանի պասքեթպոլի 18 տարեկանէն վար տղոց եւ աղջիկներու ախոյեանութեան մրցումները:
ՀԵԸ Անդրանիկ Անթիլիաս կը մասնակցի տղոց ախոյեանութեան մրցումներուն, ՀԵԸ Անդրանիկ Սին Էլ Ֆիլ՝ աղջկանց:
Տղոց ախոյեանութեան մասնակցող խումբերը բաժնուած են վեց խմբակներու:
Աղջկանց ախոյեանութեան կը մասնակցին երկու խմբակներու: Իւրաքանչիւրին գլխաւոր երկու դիրքերը գրաւող կազմերը պիտի անցնին երկրորդ փուլ:
Տղոց կազմին մարզիչն է Էլիաս Մուաուատը, վարչական պատասխանատուն՝ տոքթ. Ռաֆֆի Չուլճեանը, խմբապետը՝ Արման Չերչեանը:
Աղջկանց կազմին մարզիչն է Ժիլպեր Սալիպա, վարչական պատասխանատուն՝ Նայիրի Սուէյտի – Հայրապետեանը, խմբապետուհին՝ Էրիքա Խուրին:
Մրցումները ուղիղ եթերով կը սփռուին Լիբանանի պասքեթպոլի ֆետերասիոնին դիմատետրի (Ֆէյսպուք) էջէն:
ՀԵԸ Անդրանիկ Անթիլիաս իր առաջին մրցումը կատարեց Կիրակի, 12 Դեկտեմբեր 2021-ի առաւօտեան, Չեմփս խումբին դէմ, Զուք Միքայէլի դաշտին մէջ: Մեր տղաքը դաշտ ներկայացան յաղթելու տրամադրութեամբ եւ՝ 49-45 արդիւնքով պարտութեան մատնեցին իրենց մրցակիցը: Մրցումին MVP-ն ընտրուեցաւ ՀԵԸ Անդրանիկ Անթիլիասի մարզիկ Ժոզէֆ Խուրին:
ՀԵԸ Անդրանիկ Սին էլ Ֆիլի կազմը Կիրակի երեկոյեան ժամը 6-ին, ՀԲԸՄ-ի Տեմիրճեան կեդրոնի «Անդրանիկ» մարզադաշտին վրայ մրցեցաւ Շաալաթ էլ Քարմէլի դէմ: Միակողմանի այս մրցումին, ՀԵԸ Անդրանիկ Սին Էլ Ֆիլի մարզուհիները՝ 112- 9 արդիւնքով ջախջախիչ պարտութեան մատնեցին իրենց մրցակիցը: Մրցումին MVP-ն ընտրուեցաւ մեր մարզուհիներէն Լարա Մասուտը:
Բարի երթ եւ յաջողութիւն կը մաղթենք մեր զոյգ խումբերուն:
